Toshkentdagi “Chiroqchi jiz” kafesi joylashgan bino 6,5 mlrd so‘mga auksionga qo‘yildi

Toshkent shahar, Shayxontohur tumani, Beruniy ko‘chasidagi qahvaxona kimoshdi savdosiga qo‘yildi. Lot ma’lumotlari “E-auksion” portalida e’lon qilingan. 

Lot auksionga iqtisodiy sudlar hukmi bilan Shayxontohur tuman MIB tomonidan joylashtirilgan. Qahvaxonaning barcha qismlari xatlangan. 

Binoning umumiy maydoni 878 kvadrat metrni tashkil qiladi. 2000-yilda qurilgan 2 qavatli qahvaxona 20 ta xonadon iborat. 

Binoda gaz, suv, elektr ta’minoti va kanalizatsiya tizimi mavjud. Uning hududida “Chiroqchi jiz“ kafesi ham joylashgan.  

Auksionga qo‘yilgan qahvaxonaning boshlang‘ich bahosi — 6,48 mlrd so‘m. Arizalar 19-dekabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Avvalroq Kinder Fruits kompaniyasining 100 foiz davlat ulushi auksionga qo‘yilgani haqida xabar berilgandi.