Endilikda Twitter tasdiqlash belgi (verifikatsiya)larining rangi farqlanadi. Bu haqda ijtimoiy tarmoq egasi Ilon Maskka tayanib “TASS” xabar bermoqda.
Ilon Maskka ko‘ra, verifikatsiya belgisining rangi foydalanuvchi turiga bog‘liq bo‘ladi.
Kompaniyalar uchun tillarang, hukumat vakillari uchun kulrang, jismoniy shaxslar uchun (mashhurlar) ko‘k rangli belgilar bo‘ladi, — deyiladi postda.
Maskning ta’kidlashicha, belgini faollashtirishdan oldin akkauntlar autentifikatsiya qilinadi. Yangi tekshirish sxemasi 2-dekabrda ishga tushirilishi kutilmoqda.
Avvalroq ijtimoiy tarmoqqa egalik qiluvchi Ilon Mask: “Iltimos, shuni nazarda tutingki, Twitter yaqin oylarda ko‘p tentakona narsalarni qiladi. Biz ishlaydigan narsani qoldirib, ishlamaydigan narsalarni o‘zgartiramiz”, — deb yozgandi.
Ilon Mask oktabr oxirida Twitter’ni 44 milliard dollarga sotib olish bo‘yicha bitimni yopdi. Yozda u oldi-sotdi bitimidan bosh tortishga uringan edi, biroq sud uni ijtimoiy tarmoqni sotib olishga majbur qildi. Shunday voqealar fonida Maksning boyligi apreldan buyon 70 milliard dollarga pasayib ketdi.
Ijtimoiy tarmoqni sotib olganidan keyin Mask kompaniya xodimlarining yarmini, shu jumladan, bosh direktor Parag Agravalni, moliya direktori Ned Segalni, bosh huquqshunos Vijayu Gaddeni va boshqa bir qator top-menejerlarni ishdan bo‘shatdi.
Bloomberg ma’lumotlariga ko‘ra, Maskning yangi jamoasidagi ikki rahbar xodim — Yoel Rot va Robin Uiler iste’fo bergan. Avvalroq esa Twitter’ning axborot xavfsizligi bo‘limi boshlig‘i Lea Kissner ham ishdan bo‘shab ketgandi.
Ilon Maskning o‘zi esa xodimlariga yuborgan birinchi murojaatida kompaniya bankrot bo‘lishi mumkinligini bildirgan.
Mask verifikatsiya belgisi (ko‘k “galochka”) uchun to‘lov joriy etilishi haqida shu oy boshidayoq e’lon qilgandi. Bu avvalroq uni bepul qo‘lga kiritgan taniqli shaxslar va kompaniyalar profillariga ham tegishli bo‘ladi.
Izoh (0)