Эронда банк менежери ҳижобсиз аёлга хизмат кўрсатгани учун губернатор буйруғи билан эгаллаб турган лавозимидан четлаштирилди. Бу ҳақда Аl-Arabia хабар берди.
Маълум қилинишича, Теҳрон яқинидаги Қум провинциясида банк менежери ўранмаган аёлга хизмат кўрсатган. Бу эса унинг ишдан олинишига олиб келган. Ўранмаган аёл акс этган тасвирлар ижтимоий тармоқларда кўплаб реакцияларга сабаб бўлган.
80 миллиондан ортиқ аҳолиси бўлган мамлакатда аёллар соч, бош ва бўйинини ўраши шарт, бу мамлакат ахлоқ полицияси томонидан ўрнатилган қонун ҳисобланди. Эронда банкларнинг аксарияти давлат томонидан назорат қилинади. Ҳукумат расмийси ҳижоб қонунини татбиқ этиш бундай муассасалар раҳбарларининг зиммасида эканини таъкидлаган.
Эслатиб ўтамиз, Эронда сентябрь ўрталарида, 22 ёшли Маҳса Аминий Теҳронда метродан чиқиш чоғида ҳижобни нотўғри ўрагани учун ҳибсга олинган. Кейинроқ Аминийнинг акаси полициячилар у билан «қайта тарбиялаш» ишларини ўтказишга ваъда берганини айтган.
Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда. Мазкур воқеадан сўнг Эронда намойишлар бошланган, улар Аминийни қўллаб-қувватлашларини билдирган.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаган. Эрон ҳукумати намойишларни тартибсизликлар деб номлаган ва иштирокчиларни ҳибсга олишни бошлаган. Бунинг ортидан олти киши ўлимга ҳукм қилинган. БМТ Эрон ҳукуматини кескин қоралаган.
Изоҳ (0)