Sog‘liqni saqlash vazirining birinchi o‘rinbosari Amrillo Inoyatovning ma’lumot berishicha, respublika Onkologiya markazi hamda uning poytaxt va Toshkent viloyatidagi filiallarini yagona unikal kompleksga birlashtirib, yangi bino qurish ishlari Vazirlar Mahkamasining yopiq qarori asosida Mimar Group mas’uliyati cheklangan jamiyatiga berilgan.
“Daryo” muxbirining yozishicha, bu haqda vazir o‘rinbosari mazkur masala yuzasidan bo‘lib o‘tgan press-turda ma’lum qilgan.
Sog‘liqni saqlash vazirligi kompleks bino 8 qavatdan iborat bo‘lib, 650 o‘rin stasionar va 100 o‘rin kunduzgi stasionar davolanuvchilar uchun mo‘ljallanganini bildirgandi.
“Daryo” muxbirining aniqlashtirishicha, mazkur kompleks qurilishiga 600 milliard so‘m sarflanishi aytilmoqda. Avvalroq vazirlik Onkologiya tizimini, jumladan, ushbu kompleksni zamonaviy texnologiyalar bilan jihozlashga 80 million dollar mablag‘ ajratilayotganini ochiqlagandi.
Yangi onkologiya markazi qurilishi bo‘yicha ijtimoiy tarmoqdagi xabarlarga Davlat aktivlarini boshqarish agentligi ham munosabat bildirgandi.
Agentlik xabarlarda keltirilgan obyektlarning yer maydoni 3-4 ming dollarlik boshlang‘ich bahoda sotuvga qo‘yilgan degan vajlarni mutlaqo asossiz dedi va ushbu mulkiy majmualar qonunchilikda belgilangan tartibda mustaqil baholovchi tashkilotlar tomonidan baholanganini bildirdi.
Ushbu baholash hisobotlari yuzasidan ekspert xulosalar olingan bo‘lib, obyektlarning tegishliligi bo‘yicha 1 sotix yer maydonining boshlang‘ich bahosi 300-345 mln so‘m (27-31 ming dollar)ga teng kelmoqda. Onkologiya markazining yangi barpo etilayotgan yagona unikal kompleksi 2023-yilning may oyida ishga tushirilishi kutilmoqda.
Izoh (0)