“Hokimlar mahalla oqsoqollarining majburiy mehnatidan foydalanyapti”. Zafarbek Solijonov mahalla institutiga oid qonunchilik normalaridagi kamchiliklarni sanab berdi

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 8-soni mavzusi “Mahallada kim nimaga javob beradi?” bo‘lib, dastur mehmoni sifatida bloger, huquqshunos Zafarbek Solijonov taklif etildi.

Dastur mehmoni mahalla oqsoqollarini saylash jarayoniga oid qonunchilik hujjatlariga kamchiliklar borligini aytdi. Xususan, normadagi ayrim qismlar hokimlarga richag bo‘lib qolmoqda.

Qonunchilikning o‘zida ham ma’lum bir nozik jihatlar bor. Shu sabab mahalla oqsoqolini saylash jarayonida turli salbiy oqibatlar kelib chiqyapti. Misol uchun, mahalla oqsoqolini saylashda nomzod ko‘rsatish degan jarayon bor. O‘sha jarayonda hokim bilan kelishish degan qismi bor.

Hokimlarga ham yuqoridan, administratsiyadan turli topshiriqlar keladi, barajishi kerak u ham. Lekin ayrim hokimlar mana shu holatda mahalla instituti, oqsoqollarning majburiy mehnatidan foydalanadi.

Yana bir muammo, mahallada shunaqa odamlar bor — diplom olmagan, oliy ma’lumotli emas, lekin mahallani boshqaroladi, tadbirlarda faolligini ko‘rsatadi, davraga otilib chiqib, lokomativ vazifasini o‘tay oladi. Qonunchilikda shunaqa qism borki, qoida tariqasida oliy ma’lumotli bo‘lish so‘ralgan. U ham hokimga bog‘liq, hokimga yana bitta richag, — deydi Zafarbek Solijonov.