Соғлиқни сақлаш вазирининг биринчи ўринбосари Амрилло Иноятовнинг маълумот беришича, республика Онкология маркази ҳамда унинг пойтахт ва Тошкент вилоятидаги филиалларини ягона уникал комплексга бирлаштириб, янги бино қуриш ишлари Вазирлар Маҳкамасинг ёпиқ қарори асосида Mimar Group масъулияти чекланган жамиятига берилган.
«Дарё» мухбирининг ёзишича, бу ҳақда вазир ўринбосари мазкур масала юзасидан бўлиб ўтган пресс-турда маълум қилган.
Соғлиқни сақлаш вазирлиги комплекс бино 8 қаватдан иборат бўлиб, 650 ўрин стасионар ва 100 ўрин кундузги стасионар даволанувчилар учун мўлжалланганини билдирганди.
«Дарё» мухбирининг аниқлаштиришича, мазкур комплекс қурилишига 600 миллиард сўм сарфланиши айтилмоқда. Аввалроқ вазирлик Онкология тизимини, жумладан, ушбу комплексни замонавий технологиялар билан жиҳозлашга 80 миллион доллар маблағ ажратилаётганини очиқлаганди.
Янги онкология маркази қурилиши бўйича ижтимоий тармоқдаги хабарларга Давлат активларини бошқариш агентлиги ҳам муносабат билдирганди.
Агентлик хабарларда келтирилган объектларнинг ер майдони 3-4 минг долларлик бошланғич баҳода сотувга қўйилган деган важларни мутлақо асоссиз деди ва ушбу мулкий мажмуалар қонунчиликда белгиланган тартибда мустақил баҳоловчи ташкилотлар томонидан баҳоланганини билдирди.
Ушбу баҳолаш ҳисоботлари юзасидан эксперт хулосалар олинган бўлиб, объектларнинг тегишлилиги бўйича 1 сотих ер майдонининг бошланғич баҳоси 300-345 млн сўм (27-31 минг доллар)га тенг келмоқда. Онкология марказининг янги барпо этилаётган ягона уникал комплекси 2023 йилнинг май ойида ишга туширилиши кутилмоқда.
Изоҳ (0)