Сербия ва қисман тан олинган Косово автомобиль рақамлари бўйича келишувга эришди ва шу тариқа, низонинг янада кучайиб кетишига йўл қўймади. Бу ҳақда Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррель маълум қилди.
Келишувлар доирасида Сербия Косово шаҳарлари кодларидан иборат рақам белгиларини беришни тўхтатади, Косово эса серб рақамларига эга транспорт воситаларини қайтадан рўйхатдан ўтказишни бас қилади.
«Мамнуният билан эълон қиламанки, Косово ва Сербиянинг бош музокарачилари Евроиттифоқ кўмагида кескинликнинг янада кучайиб кетишига йўл қўймаслик имконини берувчи чора-тадбирлар ҳақида ва уларнинг алоқаларини яхшилаш ҳақидаги таклифларга бор эътиборини қаратишга келишиб олди», — деб ёзди Боррель Twitter’да.
1 ноябрдан бошлаб Косово ҳукумати минтақа ҳудудидаги машиналар серб рақамлари билан эмас, балки маҳаллий рақамлар билан ҳаракатланишини талаб қилмоқда. 21 ноябрдан Сербия рақамларига эга бўлган қонунбузарларни 150 еврога жаримага тортиш кўзда тутилган эди.
Автомобиль рақамлари атрофидаги зиддият бир ярим йилдан буён — Косово ҳукумати рақамларни алмаштириш режалари ҳақида биринчи марта эълон қилганидан кейин давом этмоқда. Энг кескин вазият 2021 йил сентябрида, Косовода истиқомат қилувчи серблар норозилик белгиси сифатида кўчаларда баррикадалар қуриб, Косово ҳукумати эса намойишчиларни куч билан тарқатиб юбориш билан қўрқитганида, юзага келган эди. Низони тартибга солиш учун вазиятга Евроиттифоқ ва НАТО аралашишига тўғри келди. Ўшандан буён томонлар келишиб олишга уринаётган эди.
Эслатиб ўтамиз, Сербия ва Косово ўртасидаги таранглик август ойи бошида яна кучайди. Вучич Косово полицияси ярим тунда республикадаги сербларга қарши ҳарбий операция бошлаганини даъво қилди. 1 августдан бошлаб Сербия ҳужжатлари Косовода ўз кучини йўқотиши керак эди.
Бир мунча вақт ўтгач, Косово республикасининг асосан, серблар яшайдиган шимолий ҳудудларида ҳаво ҳужуми сиреналари ишга туширилгани ва аҳоли баррикадалар қура бошлагани ҳақида маълумот пайдо бўлди. Кейинчалик Косово ҳукумати Европа Иттифоқи ва АҚШ элчилари билан маслаҳатлашганидан сўнг Сербия ҳужжатларига тақиқ қўйиш тартибини 1 сентябрга қолдирди.
Маълумот учун, Косово 2008 йилда Сербия таркибидан чиқиб, ўз мустақиллигини эълон қилган. Сербия ҳалигача республика мустақиллигини тан олмайди. Косовони 116 давлат, жумладан АҚШ ва Европа Иттифоқининг аксарият давлатлари тан олган.
Изоҳ (0)