Oktabr oyida Toshkentdagi uylarning ijara narxi 17 foizga o‘sgani ma’lum qilindi

Oktabr oyida Toshkentdagi ijara narxlari qanday o‘zgargani tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.

Kuz boshlarida uy-joy ijarasiga bo‘lgan talabning keskin o‘sishi qayd etilgan bo‘lib, bu oktabr oyida sotishning pasayishiga xizmat qildi.

Ma’lumotlarga ko‘ra, Toshkent shahrida uy-joy oldi-sotdi hajmining biroz kamaygani kuzatildi (-72 ta).

Bunda poytaxtda oktabr oyida o‘rtacha ijara narxi 17 foizga oshib, 1 kvadrat metr uchun 10,5 dollarni tashkil etdi, yil boshidan esa bu ko‘rsatkich 43 foizdan ziyodga ortdi.

Uy-joy ijara narxlarining eng yuqori o‘sish sur’atlari Olmazor — 49 foiz, Yashnobod — 44 foiz, Sergeli — 34 foiz va Shayxontohur — 33 foiz tumanlarida qayd etildi.

Uy-joy uchun eng yuqori ijara narxlari Shayxontohur, Mirobod va Yakkasaroy tumanlarida qayd etildi. Nisbatan arzon narxlar Uchtepa, Sergeli va Bektemir tumanlarida kuzatildi.

Umuman olganda, yil boshidan buyon uy-joy sotish hajmining o‘sishi o‘tgan yilning mos davriga nisbatan 9,2 foizni tashkil etdi.

Avvalroq uylarning ijara narxi oshishi kutilayotgani, O‘zbekistonda aholining inflyatsion kutilmalari ma’lum qilingani haqida xabar berilgandi.