Ўзбекистоннинг асосий ҳамкор давлатларида иқтисодий ўсиш қандай бўлиши кутилмоқда?

Марказий банк пул-кредит сиёсатининг 2023 йил ва 2024—25 йиллар даврига мўлжалланган асосий йўналишларини тақдим қилди. 

Таъкидланишича, пул-кредит сиёсатининг асосий йўналишларида соҳада амалга ошириладиган тадбирлар, ташқи ва ички иқтисодий шароитлар ўзгаришига Марказий банкнинг муносабати ва жавоб чоралари, пул-кредит сиёсатини юритишдаги ёндашувлар ва такомиллаштириш истиқболлари акс эттирилган. 

2022 йилда макроиқтисодий вазиятга таъсир кўрсатувчи омиллар ва уларнинг хусусиятлари аввалги йиллардагидан кескин фарқ қилди, — дейди Марказий банк. 

Марказий банкнинг таъкидлашича, 2021 йилнинг охири ва 2022 йилнинг дастлабки ойларидан бошлаб дунёнинг аксарият мамлакатларида иқтисодий тикланиш ҳолатлари кузатила бошланди. 

Лекин, февраль ойи сўнгидан Россия ва Украина ўртасидаги инқирозли вазият ҳамда энергия бозоридаги тебранишлар, таклиф ҳажмини юқори талабга мослашишининг кечикиши натижасида юзага келган юқори инфляцион босим ва унга жавобан пул-кредит сиёсатининг қатъийлаштирилиши кузатилди, — дейилади хабарда. 

Бу омиллар ҳисобга олинган ҳолда Халқаро валюта жамғармаси ва Жаҳон банки томонидан бутун дунёда, хусусан, Ўзбекистон ва унинг асосий савдо ҳамкорларининг иқтисодий ўсиш суръатлари қайта кўриб чиқилди ва 2023 йил учун ўсиш прогнозлари пасайтирилди.  

Янгиланган прогнозларга кўра, Халқаро валюта жамғармаси жаҳон иқтисодиётини 2022 йилда 3,2 фоизга, 2023 йилда 2,7 фоизга, 2024 йилда эса 3,2 фоиз атрофида ўсишини тахмин қилмоқда. 

Жаҳон банки баҳолашларига кўра, жаҳон иқтисодиёти 2022 йилда 2,9 фоизга, 2023—2024 йилларда ўртача 3 фоизга ўсиши кутилмоқда.

Ҳисоботда кўрсатилишича, Ўзбекистоннинг асосий ҳамкор давлатларида келгуси йилда иқтисодий фаолликнинг 2022 йил даражасидан паст бўлиши кутилмоқда. 

Бунда, Хитойда 2023 йилда иқтисодий ўсиш 4,4—4,5 фоиз, Қозоғистонда 3,5—4,4 фоиз, Туркияда 2,7—3 фоиз атрофида бўлиши прогноз қилинмоқда. 

Россияда эса, иқтисодиётнинг қисқариши 2023 йилда ҳам давом этиши, ижобий ўсиш суръатларига 2024 йилда эришилиши кутилмоқда.

Иқтисодий фаолликнинг нисбатан сусайиши ва нефть нархининг жорий даражада сақланиб туриши натижасида асосий савдо-ҳамкорлар миллий валюталарида юқори тебранувчанлик кутилмайди.