Dubayda dunyodagi eng baland osmono‘par bino quriladi (video)

Dubayda dunyodagi eng baland “Burj Binghatti Jacob & Co Residences” nomi ostida 112 qavatli turar joy binosi quriladi. Bu haqda Arabian Business xabar berdi.

Bino Dubayning eng mashhur moliyaviy Business Bay markazida qurilishi rejalashtirilgan. Taklif etilayotgan loyiha 100 qavatdan ortiq hashamatli ikki va uch xonali turar joylarni o‘z ichiga oladi. “Giperminora”da bolalar bog‘chasi, tansoqchi, haydovchi va shaxsiy oshpaz kabi xizmatlarni taklif qiluvchi jamoa ham bo‘ladi. Ikki xonali kvartira 8 million BAA dirhamiga (2 178 352 dollar), uch xonali kvartira esa 10 million BAA dirhamiga (2 722 940 dollar) baholanadi.

Binoning to‘rt tomonida, old, orqa, o‘ng va chap, liftlar bo‘ladi. Osmono‘par binoning tepasida “Dubaydagi eng hashamatli va eksklyuziv beshta penthaus” joylashadi.

Ushbu penthauslar uch xil bo‘lib, ular Fleurs De Jardin, Astronomia va Billionaire deb nomlanadi. Penthaus joylashgan balandlikdan shahar markazi va Dubay suv kanalini ko‘rish mumkin. Ulardan biri “milliarderlar uchun penthaus” deb ataladi. Milliarder penthaus ikki qavatdan iborat bo‘lib, kinozal, kofe-bar, sauna, haydovchilar xonasi, jakuzilar, basseyn va turli xil eksklyuziv xususiyat va qulayliklarga ega.

Binoning ichki qismi haqida juda kam ma’lumot berilgan. Ammo xususiy klublar, basseynlar va boshqa hashamatli narsalar bo‘lishi kutilmoqda. Mazkur minora Nyu-Yorkdagi 472 metrlik Central Park Tower turar joy binosidan ham baland bo‘ladi.