Xorijiy investitsiyalar ishtirokida tashkil etilgan korxonalar O‘zbekiston iqtisodiyotida qanday rol o‘ynashi tahlil qilindi. Bu haqda Prognozlashtirish va makroiqtisodiy tadqiqotlar instituti xabar bermoqda.
Ma’lumotlarga ko‘ra, hozirda mamlakat iqtisodiyotida xorijiy investitsiyalar ishtirokida tashkil etilgan korxonalarning ahamiyati ortib bormoqda.
2017—2021-yillar oralig‘ida xorijiy investitsiyalar ishtirokidagi korxonalar soni 2,7 baravarga oshib, 2022-yilning 1-yanvar holatiga ko‘ra, 13,2 mingtaga yetgan.
Iqtisodiyotga investitsiya kiritayotgan 50 dan ortiq mamlakat orasida Xitoy, Rossiya, Turkiya, Qozog‘iston va Janubiy Koreya yetakchilik qilmoqda.
Xorijiy kapital ishtirokidagi korxonalar asosan iqtisodiyotning sanoat (30,6 foiz) va savdo (28,5 foiz) sohalarida faoliyat yuritmoqda.
Chet el kapitali ishtirokidagi korxonalarda iqtisodiyotda rasman band aholining 6 foizi faoliyat yuritadi, biroq ushbu korxonalarning ishlab chiqarishdagi ulushi 15 foizni, asosiy kapitalga investitsiyalardagi ulushi esa 24 foizni tashkil etadi.
Bunday korxonalar mamlakatdagi jami korxonalarning 2,5 foizini tashkil etsada, 2021-yilda mamlakat tashqi savdo aylanmasining 19,8 foizi, eksport va importning mos ravishda 19,7 foizi va 25 foizi ularning hissasiga to‘g‘ri kelgan.
Tahlil shuni ko‘rsatmoqdaki, chet el kapitali ishtirokidagi korxonalar faoliyat ko‘rsatuvchi xo‘jalik subyektlarining eng samarador va eng faol qatlami hisoblanadi.
2022—2026-yillarga mo‘ljallangan taraqqiyot strategiyasiga ko‘ra, kelgusi 5 yilda iqtisodiyotga 70 milliard dollar miqdorida xorijiy investisiyalarni jalb etish hamda 2026-yilga borib, eksport hajmini 30 milliard dollarga yetkazish maqsad qilingan.
Ushbu maqsadlarga erishishda chet el investitsiyalari ishtirokidagi korxonalar sonini oshirish, shuningdek, ularning eksport faoliyatini rag‘batlantirish muhim ahamiyatga ega.
Avvalroq 2023-yilda O‘zbekistonda iqtisodiy o‘sish sekinlashishi va inflyatsiya pasayishi prognoz qilingani haqida xabar berilgandi.
Izoh (0)