Rossiya neftiga qarshi sanksiyalar kuchga kirishidan ikki hafta oldin Shimoliy Yevropaga yetkazib berish fevral oyi boshiga nisbatan 90 foizdan ko‘proqqa qisqardi — kuniga 1,2 million barreldan kuniga 95 ming barrelgacha. Bu haqda Bloomberg xabar bermoqda.
Ma’lumotlariga ko‘ra, Rotterdam shahri O‘rta Yer dengizi va Qora dengiz havzalaridan tashqaridagi yagona Yevropa yuk tashish manzili bo‘lib qolmoqda.
Litva, Fransiya va Germaniya kabi davlatlar bir necha oy oldin Rossiya neftini import qilishni to‘xtatgan edi.
Sentabr oyida ular orasiga Polsha qo‘shildi. Boltiqbo‘yi portlariga yuklangan neftning to‘rtdan uch qismi hozir Osiyoga mo‘ljallangan.
Hindiston energiyani “imtiyozli davr” yordamida sotib olmoqda — AQSH, Buyuk Britaniya va Yevropa Ittifoqi cheklovlar kuchga kirgunga qadar jo‘natilgan tovarlarni 19-yanvargacha yetkazib berish sharti bilan, 5-dekabrda sanksiyalardan ozod qiladi.
18-noyabrgacha yetti kun ichida Rossiyadan yetkazib beriladigan neft hajmi kuniga 2,57 million barrelgacha qisqardi, bu to‘qqiz haftadagi eng past ko‘rsatkichdir.
Bloomberg ma’lumotlariga ko‘ra, Rossiyaning neft daromadlari yanvar oyi boshidan beri eng past darajaga tushib ketdi. Xitoy, Hindiston va Turkiyaga yetkazib berish kuniga rekord darajadagi 2,45 million barrelga yetgan.
Avvalroq G7 va Avstraliya Rossiya neftiga qat’iy narx belgilashga kelishib olgan edi. Ular 23-noyabr kuni batafsil ma’lumotlarni e’lon qiladi. Rossiya neftiga narx belgilash 5-dekabrga rejalashtirilgan.
Rossiya bunday mexanizmni joriy qilgan mamlakatlarga neft yetkazib bermaslikka va’da berdi va ishlab chiqarish hajmi kamayishini istisno qilmadi.
Izoh (0)