Хорижий инвестициялар иштирокида ташкил этилган корхоналар Ўзбекистон иқтисодиётида қандай рол ўйнаши таҳлил қилинди. Бу ҳақда Прогнозлаштириш ва макроиқтисодий тадқиқотлар институти хабар бермоқда.
Маълумотларга кўра, ҳозирда мамлакат иқтисодиётида хорижий инвестициялар иштирокида ташкил этилган корхоналарнинг аҳамияти ортиб бормоқда.
2017—2021 йиллар оралиғида хорижий инвестициялар иштирокидаги корхоналар сони 2,7 бараварга ошиб, 2022 йилнинг 1 январь ҳолатига кўра, 13,2 мингтага етган.
Иқтисодиётга инвестиция киритаётган 50 дан ортиқ мамлакат орасида Хитой, Россия, Туркия, Қозоғистон ва Жанубий Корея етакчилик қилмоқда.
Хорижий капитал иштирокидаги корхоналар асосан иқтисодиётнинг саноат (30,6 фоиз) ва савдо (28,5 фоиз) соҳаларида фаолият юритмоқда.
Чет эл капитали иштирокидаги корхоналарда иқтисодиётда расман банд аҳолининг 6 фоизи фаолият юритади, бироқ ушбу корхоналарнинг ишлаб чиқаришдаги улуши 15 фоизни, асосий капиталга инвестициялардаги улуши эса 24 фоизни ташкил этади.
Бундай корхоналар мамлакатдаги жами корхоналарнинг 2,5 фоизини ташкил этсада, 2021 йилда мамлакат ташқи савдо айланмасининг 19,8 фоизи, экспорт ва импортнинг мос равишда 19,7 фоизи ва 25 фоизи уларнинг ҳиссасига тўғри келган.
Таҳлил шуни кўрсатмоқдаки, чет эл капитали иштирокидаги корхоналар фаолият кўрсатувчи хўжалик субъектларининг энг самарадор ва энг фаол қатлами ҳисобланади.
2022—2026 йилларга мўлжалланган тараққиёт стратегиясига кўра, келгуси 5 йилда иқтисодиётга 70 миллиард доллар миқдорида хорижий инвестисияларни жалб этиш ҳамда 2026 йилга бориб, экспорт ҳажмини 30 миллиард долларга етказиш мақсад қилинган.
Ушбу мақсадларга эришишда чет эл инвестициялари иштирокидаги корхоналар сонини ошириш, шунингдек, уларнинг экспорт фаолиятини рағбатлантириш муҳим аҳамиятга эга.
Аввалроқ 2023 йилда Ўзбекистонда иқтисодий ўсиш секинлашиши ва инфляция пасайиши прогноз қилингани ҳақида хабар берилганди.
Изоҳ (0)