«Дарё» колумнисти, ҳуқуқшунос Саидали Мухторалиев 10 ноябрь кунидан кучга кирган «Давлат фуқаролик хизмати тўғрисида»ги қонун бўйича давлат фуқаролиги хизматчиси лавозимига ишга жойлашиш мавзуси бўйича тушунтириш берди.
Қонунда давлат фуқаролиги хизматига, лавозимига ишга кириш учун маълум бир чекловлар ўрнатиляпти. Албатта, бошқа соҳаларга нисбатан амалдаги Меҳнат кодексида ёки янги таҳрирда қабул қилинган Меҳнат кодексидаги қоидаларда Ўзбекистон ва чет эл фуқароларига ҳамда фуқаролиги бўлмаган шахсларга бирдек амал қилиши кўрсатилган.
Умумий тоифа вазифаларига, лавозимларига ишга кириш учун, албатта, Ўзбекистон фуқароси бўлиш шарт эмас. Фуқаролиги бўлмаган шахслар ҳам, чет эл фуқаролари ҳам чекловсиз ишга кириши мумкин, чеклов йўқ.
«Давлат фуқаролиги тўғрисида»ги қонунда эса айтиляптики, давлат фуқаролик хизматчилари лавозимларига фақат Ўзбекистон фуқаролари ишга қабул қилиниши мумкин. Шу билан бирга, давлат тилини билган Ўзбекистон фуқаролари ишга қабул қилиниши мумкинлиги кўрсатиляпти. Тўғри, чет эл фуқароларини ишга ёллаш масаласи бўйича алоҳида қонунчилик ҳужжатларида белгиланган талаблар, тартиблар ишлайди. Лекин аниқ айта оламан, давлат фуқаролиги хизматчилари лавозимига қўйиладиган биринчи талаб — Ўзбекистон фуқароси бўлиш ҳамда давлат тилини яхши билиш.
Иккинчи муҳим масала давлат фуқаролик хизматчилари лавозимига қабул қилиш учун қўйиладиган чекловлар:
- 18 ёшга тўлмаган фуқаролар ишга қабул қилиниши;
- суд ҳукми билан давлат фуқаролиги хизмати лавозимида ишлашдан маҳрум қилинган шахслар;
- коррупцияга оид ҳуқуқбузарлик содир қилган шахслар ҳам давлат фуқаролик хизматчилари лавозимларига, у раҳбарлик лавозими бўладими, оддий мутахассислик лавозимлари бўладими, ишга қабул қилиниши мумкин эмас.
Давлат фуқаролик хизматчиси лавозимига ишга кириш масаласи тўлақонли шаффоф танлов тизими орқали амалга оширилади. Ҳозирда ҳам бизда бу тизим бор. Кўпчилигимиз биламиз, вазирликлар, давлат қўмиталари, давлат идораларида Давлат хизматини ривожлантириш агентлиги орқали йўлга қўйилган махсус танлов тизими бор. Бу тизим янада такомиллашади. Боиси давлат фуқаролиги хизматчиси лавозимига ишга кириш учун махсус инновацион тизимни яхши йўлга қўйган танловдан ўтишга тўғри келади. Ушбу танловдан ижобий натижалар билан ўтгандан кейин бу лавозимга ишга кириш мумкин бўлади.
Айни пайтда қонуннинг ижроси бўйича қабул қилинадиган қонуности ҳужжатлардан бири эълон қилиниши кутиляпти. Давлат фуқаролиги тизими соҳасида танлов ўтказиш бўйича махсус низом, махсус тартиб Ўзбекистон президенти томонидан тасдиқланади. Албатта, бу низомда ўша танловда иштирок этиш учун фуқаролик, малака даражаси ва захира талаблари билан боғлиқ жиҳатлар, махсус нормалар кўзда тутилади. Бу ҳужжат ҳам шу кунларда қабул қилиниши, кучга кириши кутиляпти.
Изоҳ (0)