“Ratifikatsiyaga qarshi ovoz berganlar nimaga qarshiligini bilmaydi” — Qamchibek Tashiyev

Qirg‘iziston Milliy xavfsizlik davlat qo‘mitasi rahbari Qamchibek Tashiyev O‘zbekiston bilan chegara to‘g‘risidagi kelishuvni ratifikatsiya qilishga qarshi chiqqan deputatlarni tanqid qildi. Bu haqda “AKIpress” xabar berdi.

Tashiyevning so‘zlariga ko‘ra, bu orqali alohida partiya yoki siyosiy tashkilotning emas, balki butun davlatning muammolari hal qilinmoqda.

“Deputatlar, savolingiz bo‘lsa, bering dedim. Hammasini tushuntirib, ko‘rsatishimni aytdim. Qayerda muvaffaqiyatsizlik bo‘ldi, qayerda yo‘qotyapmiz? Ular hech narsa deya olmaydi, ‘bunga qarshimiz’ deydi xolos. Nega qarshi? Shunchaki”, — deydi Tashiyev.

Milliy xavfsizlik davlat qo‘mitasi rahbari bunday deputatlar “xalq umidini sotgan”ini qayd etdi.

“Ko‘ryapsizmi, ular davlat, xalq va Qirg‘iziston uchun muhim masalani hal etayotib, xalqning umidini sotdi. Shuning uchun prezidentimiz to‘g‘ri aytdi: ‘Hurmatli deputatlar, sizlar hokimiyat muxolifati bo‘lishingiz mumkin, ammo davlatniki emas. Davlat kerakmi? Ratifikatsiya qilish kerak. Davlatni himoya qilish kerakmi? Jonimizni berishimiz kerak. Davlat uchun birlashish kerakmi? Hamma birga harakat qilishi kerak’”, — deydi rasmiy.

14-noybar kuni O‘zbekiston Bosh vaziri Abdulla Aripov O‘zbekiston va Qirg‘izistonning bahsli yer masalalariga aniqlik kiritilganini aytgandi. Bosh vazir Qirg‘iziston G‘ovasoy daryosining oqimiga to‘sqinlik qilmaslik va suvini ifloslantirmaslik majburiyatini olganini qayd etgan. Bundan tashqari, Qirg‘iziston hududida joylashgan, O‘zbekistonning eksklav hududi bo‘lgan So‘x tumani aholisining chegaradan o‘tib-qaytishida yanada yengillik yaratish bo‘yicha ikki davlat hukumatlari o‘zaro kelishuvga erishilgani ma’lum qilingan.

Shuningdek, Bosh vazir yangi chegara chiziqlarini belgilashda O‘zbekiston chegara chizig‘idan 130 ta xonadonni ko‘chirish nazarda tutayotganini aytgan.

17-noyabr kuni Qirg‘iziston parlamenti O‘zbekiston bilan chegara to‘g‘risidagi kelishuvni ratifikatsiya qilgan. Parlament deputatlarining 64 nafari kelishuvni yoqlab, 19 nafari unga qarshi ovoz bergandi. Qirg‘iziston prezident Sadir Japarov va Milliy xavfsizlik davlat qo‘mitasi rahbari Qamchibek Tashiyev deputatlarni kelishuvni qo‘llab-quvvatlashga chaqirgan. Parlament yig‘ilishi bahs-munozaralar va tortishuvlar bilan o‘tgan.

18-noybar kuni Senat Qirg‘iziston bilan chegarani delimitatsiya qilish va Kampirobod suv ombori to‘g‘risidagi shartnomalarni ma’qullagan.