Birlashgan Millatlar Tashkilotining iqlim o‘zgarishi bo‘yicha COP27 konferensiyasi ishtirokchilari rivojlanayotgan mamlakatlarning iqlim o‘zgarishi salbiy ta’siridan ko‘rgan yo‘qotishlari va zararlarini qoplash uchun jamg‘arma yaratishga kelishib oldi.
Misrda o‘tkazilgan COP27 iqlim bo‘yicha muzokaralarning so‘nggi kuni, 18-noyabrda bu masala muvaffaqiyatsizlikka uchrashiga oz qoldi, biroq konferensiya yana bir kunga cho‘zilganidan so‘ng tomonlar “iqlim zararini to‘lash bo‘yicha tarixiy kelishuv”ga erishdi, deb yozadi Bloomberg. Kelishuv 20-noyabr kuni ertalab tuzilgan.
Jamg‘arma kuchsiz mamlakatlarga bo‘ronlar, toshqinlar va “rivojlangan mamlakatlarning tarixiy uglerod chiqindilari oqibatida yuzaga kelgan boshqa ofatlar” bilan kurashishda yordam berish uchun yaratildi, deb ta’kidlaydi Reuters.
Associated Press xabariga ko‘ra, dastlab jamg‘arma rivojlangan mamlakatlarning, shuningdek, jismoniy shaxslar, jamoat tashkilotlari va xalqaro moliya institutlarining badallari hisobidan shakllantiriladi.
Izoh (0)