Rossiya va Eron vakillari Rossiya hududida Eronning yuzlab dronlarini ishlab chiqarishga kelishib oldi. Bu haqda The Washington Post gazetasi AQSH va boshqa G‘arb davlatlari razvedka xizmatlari ma’lumotlariga tayanib xabar berdi.
WP gazetasi iqtibos keltirgan AQSH razvedkasi ma’lumotlariga ko‘ra, avgust oyidan buyon Rossiya Ukrainadagi urushda Eronda ishlab chiqarilgan 400 dan ortiq jangovar dronlardan foydalangan. Ularning aksariyati fuqarolik infratuzilmasiga zarba berish uchun ishlatilgan.
Eron dronlarini yig‘ish liniyasini ishga tushirish orqali Rossiya so‘nggi haftalarda Ukrainadagi urushning borishini o‘zgartirgan nisbatan arzon, ammo juda vayronkor dronlar zaxirasini sezilarli darajada oshirishi mumkin, deyiladi gazeta xabarida.
Eron va Rossiya bir necha oydan beri Ukrainadagi janglarda Eronda ishlab chiqarilgan jangovar uchuvchisiz uchar apparatlardan foydalanilayotganini rad etib keladi. Noyabr oyi boshida Eron Tashqi ishlar vazirligi birinchi marta Rossiyaga bir qancha dronlar yetkazilganini tasdiqladi, biroq bu Ukrainaga bosqindan oldin sodir bo‘lganini aytdi.
Izoh (0)