«Ратификацияга қарши овоз берганлар нимага қаршилигини билмайди» — Қамчибек Ташиев

Қирғизистон Миллий хавфсизлик давлат қўмитаси раҳбари Қамчибек Ташиев Ўзбекистон билан чегара тўғрисидаги келишувни ратификация қилишга қарши чиққан депутатларни танқид қилди. Бу ҳақда «AКИpress» хабар берди.

Ташиевнинг сўзларига кўра, бу орқали алоҳида партия ёки сиёсий ташкилотнинг эмас, балки бутун давлатнинг муаммолари ҳал қилинмоқда.

«Депутатлар, саволингиз бўлса, беринг дедим. Ҳаммасини тушунтириб, кўрсатишимни айтдим. Қаерда муваффақиятсизлик бўлди, қаерда йўқотяпмиз? Улар ҳеч нарса дея олмайди, ‘бунга қаршимиз’ дейди холос. Нега қарши? Шунчаки», — дейди Ташиев.

Миллий хавфсизлик давлат қўмитаси раҳбари бундай депутатлар «халқ умидини сотган»ини қайд этди.

«Кўряпсизми, улар давлат, халқ ва Қирғизистон учун муҳим масалани ҳал этаётиб, халқнинг умидини сотди. Шунинг учун президентимиз тўғри айтди: ‘Ҳурматли депутатлар, сизлар ҳокимият мухолифати бўлишингиз мумкин, аммо давлатники эмас. Давлат керакми? Ратификация қилиш керак. Давлатни ҳимоя қилиш керакми? Жонимизни беришимиз керак. Давлат учун бирлашиш керакми? Ҳамма бирга ҳаракат қилиши керак’», — дейди расмий.

14-нойбар куни Ўзбекистон Бош вазири Абдулла Арипов Ўзбекистон ва Қирғизистоннинг баҳсли ер масалаларига аниқлик киритилганини айтганди. Бош вазир Қирғизистон Ғовасой дарёсининг оқимига тўсқинлик қилмаслик ва сувини ифлослантирмаслик мажбуриятини олганини қайд этган. Бундан ташқари, Қирғизистон ҳудудида жойлашган, Ўзбекистоннинг эксклав ҳудуди бўлган Сўх тумани аҳолисининг чегарадан ўтиб-қайтишида янада енгиллик яратиш бўйича икки давлат ҳукуматлари ўзаро келишувга эришилгани маълум қилинган.

Шунингдек, Бош вазир янги чегара чизиқларини белгилашда Ўзбекистон чегара чизиғидан 130 та хонадонни кўчириш назарда тутаётганини айтган.

17 ноябрь куни Қирғизистон парламенти Ўзбекистон билан чегара тўғрисидаги келишувни ратификация қилган. Парламент депутатларининг 64 нафари келишувни ёқлаб, 19 нафари унга қарши овоз берганди. Қирғизистон президент Садир Жапаров ва Миллий хавфсизлик давлат қўмитаси раҳбари Қамчибек Ташиев депутатларни келишувни қўллаб-қувватлашга чақирган. Парламент йиғилиши баҳс-мунозаралар ва тортишувлар билан ўтган.

18-нойбар куни Сенат Қирғизистон билан чегарани делимитация қилиш ва Кампиробод сув омбори тўғрисидаги шартномаларни маъқуллаган.