Germaniya Rossiya bilan o‘rtasida urush boshlangan taqdirda qo‘llaydigan mudofaa harakatlari rejasini tayyorladi. Bu haqda Der Spiegel nashri xabar berdi.
Nashr Germaniya qurolli kuchlari bosh inspektori general Eberxard Zorn tomonidan imzolangan 68 sahifalik hujjatni nazarda tutmoqda. Unda agar Moskva Berlinga hujum qilsa, nemis tomoni juda katta zarar ko‘rishi keltirilgan.
“Germaniyaga hujum ogohlantirishsiz sodir bo‘lishi va mamlakatga katta zarar yetkazishi mumkin. Rossiyani to‘xtatib turishda maxsus ssenariy uchun tayyorlangan va o‘qitilgan kuchlar jalb qilinadi. Hisobotda kichik bo‘linmalarning xorijiy missiyalarda ishtirok etishi hozirgi siyosiy muhitga mos kelmasligi keltiriladi”, deyiladi xabarda.
Hujjatga tayanib, Der Spiegel yangi harakatlar rejasi nafaqat harbiy xarajatlarni oshirish, balki yirik tuzilmalar yaratishni, jumladan 10 ming kishigacha bo‘lgan diviziyani ham nazarda tutishini ta’kidladi.
Mart oyida AQSH va NATOning boshqa ittifoqchilari Rossiyaning alyansga a’zo davlatlar hududiga ehtimoliy hujumiga tayyorgarlik ko‘rgandi. Oq uyning milliy xavfsizlik bo‘yicha maslahatchisi Jeyk Sallivan AQSH prezidenti Jo Baydenning Polshaga tashrifi chog‘ida bu bo‘yicha ma’lumot bergandi.
“Biz Rossiyaning NATO hududiga zarba berishga qaror qilishi ehtimoli bo‘yicha favqulodda vaziyatlarni rejalashtirmoqdamiz. Prezident Bayden, agar Rossiya NATOga hujum qilsa, ittifoqimizning boshqa a’zolari bilan birgalikda javob berishga tayyorligini aytdi”, — degan Sallivan.
O‘z navbatida, Moldova prezidenti Mayya Sandu ham Rossiyaning mamlakatga hujum qilish ehtimolini baholagandi. U Moskva hujum qilishni rejalashtirayotgani haqida ma’lumot yo‘qligini qayd etgan.
Izoh (0)