Сурхондарёнинг Жарқўрғон туманида асфальтсиз лойли йўллардан норози аҳолиси йўлни тўсиб қўйгани ҳақида хабарлар ва ҳолат акс этган видео ижтимоий тармоқларда тарқалди. Вилоят ҳокимлиги вазиятга аниқлик киритди.
Унда айтилишича, тарқалган видеоматериалда Жарқўрғон тумани марказига олиб борувчи 4Р-100б автомобиль йўлининг 0-11 километр қисми тасвирга олинган бўлиб, автомобиль йўлининг юк кўтариш қобилияти бир ўққа тушадиган тегишли меъёрий оғирликдан оғир бўлган юк автомобилларининг мунтазам равишда ҳаракатланиши оқибатида йўл таъмирталаб ҳолатга келиб қолган.
Ҳозирда Жарқўрғон туман Йўллардан фойдаланиш унитар корхонаси томонидан бор куч ва воситаларни ишга солган ҳолда биринчи навбатда ушбу автомобиль йўлида транспорт воситаларининг ҳаракат хавфсизлиги ва узлуксизлигини таъминлаш чоралари кўрилган.
Сурхондарё вилояти автомобиль йўллари бош бошқармаси ва бошқа мутасадди ташкилотлар масъуллари аҳоли вакиллари билан учрашиб, 4Р-100б автомобиль йўлининг 0-11 километр қисмини таъмирлаш ишлари 2023 йил 1 чорагида амалга оширилиши белгилангани юзасидан тушунтириш ишлари олиб борган.
Аҳолининг норозилигига сабаб бўлган ушбу масала Сурхондарё вилояти автомобиль йўллари бош бошқармаси томонидан назоратга олинган.
Изоҳ (0)