Қозоғистонда президентлик сайловлари бўлиб ўтмоқда (фото)

Қозоғистонда бугун, 20 ноябрь куни президентлик сайловлари бошланди, бутун мамлакат бўйлаб сайлов участкалари очилди.

Давлат раҳбари лавозимига олти нафар номзод даъвогарлик қилмоқда:

• «Профессионал ижтимоий ишчилар миллий альянси» республика жамоат бирлашмасидан Каракат Абден;
• Умуммиллий социал-демократик партиядан Нурлан Ауесбаев;
• «Овул» Халқ демократик ватанпарварлик партиясидан Жигули Даирабоев;
• «Қозоғистон касаба уюшмалари ҳамдўстлиги «Amanat» касаба уюшмалари республика бирлашмасидан Мейрам Кажикен;
• «Қазақ аналари – дастурге жол» республика жамоат бирлашмасидан Салтанат Турсинбекова;
• Қозоғистоннинг амалдаги президенти Қосим-Жўмарт Тўқаев. Мамлакат Марказий сайлов комиссияси расмий бюллетенида айтилишича, у «қатор республика жамоат бирлашмалари»дан номзод сифатида кўрсатилган. Тўқаев ҳеч бир партиянинг аъзоси эмас, октябрь ойида унинг номзоди Қозоғистон Миллий кўнгиллилар тармоғи ва мамлакат Фуқаролик альянси томонидан кўрсатилган эди.

Tengrinews хабар беришича, сайловда Мажилис (парламент қуйи палатаси) раиси Ерлан Кошанов, Сенат (юқори палата) спикери Маулен Ашимбаев, бош вазир Алихан Смаилов, Олмаота шаҳри ҳокими Ерболат Дўсаев, Тўқаев ва бошқа номзодлар аллақачон ўз овозини берди.

Тўқаев Қозоғистонда муддатидан олдин президентлик сайловларини ўтказиш тўғрисидаги фармонни 21 сентябрь куни имзолаган эди. Аввалроқ у мамлакатнинг сиёсий тизимини ислоҳ қилган, янги конституцияга кўра, президент етти йилга ва фақат бир муддатга сайланади.