Тошкент шаҳрининг Мирзо Улуғбек ва Зангиота туманларида кир ювиш кукунларини қўлбола усулда тайёрлаб сотиш ҳолатлари фош этилди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Мирзо Улуғбек туман бўлими томонидан тезкор тадбир ўтказилган. Унда фуқаролар П.У. ва А.Ў. бир қатор таниқли савдо белгиларидан фойдаланган ҳолда контрафакт кир ювиш кукунлари ишлаб чиқараётгани аниқланган.
Улар ҳар бири 3 килограммдан бўлган қўлбола усулда қадоқланган 3 149 дона кир ювиш кукунини фуқаро У.П.га 5 300 долларга сотган вақтида ашёвий далиллар билан ушланган.
Шунингдек, департаментнинг Зангиота туман бўлими томонидан Давлат солиқ инспекцияси ходимлари билан ҳамкорликда тезкор тадбир ўтказилган. Унда фуқаролар М.Х. ва Д.Х. «А.К.» МЧЖга тегишли нотурар бинонинг бир қисмини ўзаро келишув асосида ижарага олиб, яширин цех ташкил қилиб, турли савдо белгиларидан фойдаланган ҳолда контрафакт кир ювиш кукунларининг савдоси билан шуғулланиб келгани аниқланган.
Ушбу цехдан 13 050 килограмм туз, 2 653 килограмм қўлбола усулда тайёрланган кир ювиш кукуни, 2 157 дона идиш ва бошқа товар моддий бойликлар ашёвий далил сифатида олинган.
Мазкур ҳолатлар юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)