AQSH Kongressining Vakillar palatasidagi respublikachilar Ukrainani qo‘llab-quvvatlash uchun ajratilgan mablag‘larni tekshirish bo‘yicha rezolyutsiya taqdim qildi. Bu haqda Kongress quyi palatasi a’zosi Marjori Teylor Grin matbuot anjumanida aytib o‘tdi.
“Bugun men AQSH prezidentiga so‘rov yuborishni hamda Mudofaa vaziri va Davlat kotibining 2022-yil 15-noyabrgacha Ukrainaga ajratilgan mablag‘lar bo‘yicha Vakillar palatasiga tegishli hujjatlarni taqdim etishi kerakligini nazarda tutuvchi rezolyutsiya kirityapman”, — dedi Grin.
Respublikachilar partiyasi vakili Ukraina Amerikaning 51-shtati emasligini ta’kidladi. Uni qo‘llab-quvvatlash uchun yuborilgan amerikalik soliq to‘lovchilarning pullarini esa, diplomatning so‘zlariga ko‘ra, AQSH janubiy chegarasi himoyasini kuchaytirishga sarflash mumkin edi.
Bundan tashqari, Grin jarayon shaffof emasligi tufayli Demokratik partiya pulning bir qismini o‘z kampaniyalari uchun ishlatishi mumkinligini taxmin qilib, mablag‘lar aynan qanday sarflanayotgani noma’lumligini ta’kidladi.
“Biz amerikalik soliq to‘lovchilarning Ukrainaga yuborilgan har bir dollarini tekshirishimiz kerak. Amerika xalqi o‘z pullari nimaga sarflanayotganini bilishga loyiq”, — deb yozdi respublikachi Twitter’da.
Endi rezolyutsiya mas’ul qo‘mita tomonidan ikki hafta ichida ko‘rib chiqilishi kerak, shundan so‘ng u Kongressga ovoz berish uchun yuboriladi. The Hill nashrining yozishicha, hozir demokratlar hujjatni rad etishi mumkin, biroq Grin agar shunday bo‘lsa, parlament quyi palatasida ko‘pchilikni tashkil qilayotgan respublikachilar rezolyutsiyani qayta kiritishi haqida ogohlantirdi.
Urush boshlanganidan beri AQSH Kongressi Ukrainani qo‘llab-quvvatlash uchun 65 milliard dollardan ortiq mablag‘ yubordi. Noyabr oyi o‘rtalarida prezident Jo Bayden ma’muriyati Kongressdan yana 37 milliard so‘ragan.
Respublikachilar partiyasi 2022-yil noyabrida Kongress quyi palatasida ko‘pchilikni qo‘lga kiritdi, endi 2023-yildan boshlab respublikachilar prezident ma’muriyatining kun tartibiga ta’sir o‘tkazishi mumkin bo‘ladi. Demokratlar so‘nggi ikki yil davomida parlamentning har ikki palatasini nazorat qilib kelgan. Kongressdagi kuchlarning yangi birlashuvi Ukrainaga yordam ajratishga ta’sir qilishi mumkin.
Izoh (0)