Россиянинг Украинага кенг кўламли қуролли тажовузи оқибатида 18 ноябрь ҳолатига кўра, 433 нафар бола ҳалок бўлган, 837 нафардан ортиғи турли оғирликдаги жароҳатлар олган. Бу рақамлар якуний эмас, чунки фаол ҳарбий ҳаракатлар зонасида, вақтинча босиб олинган ва озод қилинган ҳудудларда қурбонларни аниқлаш давом этмоқда. Бу ҳақда Украина Бош прокуратураси хабар берди.
Ҳисоботда охирги икки кун ичида ҳалок бўлган ва яраланган болалар ҳақидаги маълумотлар ҳам келтирилган.
«17 ноябрь куни Запорожье вилоятининг Волнянск шаҳридаги хусусий уйга душманнинг ракета ҳужуми оқибатида 10 киши ҳалок бўлди. Улар орасида 11 ва 17 ёшли икки бола ҳам бор. 16 ноябрь куни Харьков вилоятида Россия қўшинлари томонидан Изюм шаҳри ўққа тутилиши оқибатида 11 ёшли қиз яраланди. 17 ноябрь куни Днепр шаҳрининг ўққа тутилишида 15 ёшли қиз ҳам яраланган», — дейилади хабарда.
Бош прокуратура, шунингдек, Украинадаги портлашлар ва ўққа тутишлар оқибатида 2 719 та таълим муассасаси зарар кўргани, улардан 332 таси бутунлай вайрон бўлганини қайд этди.
Изоҳ (0)