Xersonda Ukraina tomonidan jang qilayotgan ko‘ngillilar va vayron bo‘lgan aeroport. Urushning 267-kunidan fotoreportaj
Ukraina hukumati Rossiya tomonidan Odessa, Dnepr va Xarkov viloyatidagi infratuzilmaga yangi zarbalar yo‘llangani haqida xabar berdi. “Naftogaz Ukrani” shirkati Ukraina sharqida gaz ishlab chiqarish obyektlari vayron bo‘lgani va shikastlanganini ma’lum qildi. Dneprda snaryadlar oqibatida 23 kishi jabrlandi, turar joy binolari vayron bo‘ldi. Zaporojye viloyatining Volnyansk shahrida raketa hujumi oqibatida yetti kishi halok bo‘ldi.
Gaaga sudi rossiyalik Igor Girkin va Sergey Dubinskiyni, shuningdek, ukrainalik Leonid Xarchenkoni 2014-yilda Donbassda yuz bergan Boeing halokatida aybdor deb topdi va sirtdan umrbod qamoq jazosiga hukm qildi. Rossiyaning Bryansk viloyatida avtomobilda ketayotgan ikki mahalliy aholi Ukraina bilan chegarada minaga uchrab portladi, ulardan biri halok bo‘ldi. Xerson viloyatida rossiyalik harbiylar tomonidan o‘ldirilgan 63 kishining jasadi topilgani aytilmoqda. Donetsk, Nikolayev, Xarkov va Xerson viloyatlarining ozod qilingan hududlarida Ukraina politsiyasi jami mingga yaqin tinch aholining jasadini topdi.
Meduza urushning 267-kunidan asosiy fotosuratlarni taqdim etdi.
Ukraina xalqaro legioni Xersondagi frontda
Xersonning Dnepr o‘ng qirg‘og‘i qismidagi Ukraina pozitsiyalarida turgan snayper. Ukraina xalqaro legioni 2022-yil fevral oyida Vladimir Zelenskiy buyrug‘i bilan Ukraina Qurolli kuchlarining hududiy mudofaasi doirasida tuzilgan. Urushning dastlabki kunlarida dunyoning 52 mamlakatidan 20 mingga yaqin odam legionga qo‘shilish uchun ro‘yxatdan o‘tgan.Foto: Getty Images
Xalqaro legion askarlari Xersonning Dnepr chap qirg‘og‘i qismidagi Rossiya pozitsiyalarini o‘qqa tutishga tayyorlanmoqda. Legionga eng ko‘p AQSH, Buyuk Britaniya, Polsha, Boltiqbo‘yi mamlakatlari, Kanada, Norvegiya, Finlyandiya va Daniyadan askarlar kelgan. Rossiya va Belarus fuqarolari legionga qabul qilinmaydi, ammo Qurolli kuchlar ma’lumotlariga ko‘ra, rossiyaliklardan juda ko‘p arizalar kelgan.Foto: Getty Images
Xalqaro legion jangchisi Xerson viloyatidagi Rossiya pozitsiyalariga qarata o‘q uzmoqda.Foto: Getty Images
Xalqaro legion a’zolari fonar yorug‘ida qahva qaynatmoqda.Foto: Getty Images
Zaporojye viloyatining o‘qqa tutilishi oqibatlari
Ukraina politsiyasi Rossiya qo‘shinlarining raketa zarbasidan halok bo‘lganlar jasadini qidirmoqda. 17-noyabrga o‘tar kechasi Rossiya qo‘shinlari Zaporojye viloyatidan 30 kilometr shimoli-sharqda joylashgan va Ukraina Qurolli kuchlari nazorati ostidagi Volnyansk shahrini o‘qqa tutdi. Raketa turar joy binosiga kelib tushdi, u butunlay vayron bo‘ldi. So‘nggi ma’lumotlarga ko‘ra, yetti kishi halok bo‘lgan.Foto: Reuters
Politsiya xodimlari rus raketasi bilan vayron qilingan uy vayronalari orasidan topilgan jasadlarni ko‘zdan kechirmoqda.Foto: Scanpix
Rossiya raketasi tushgan joyda qutqaruvchilar ishlamoqda.Foto: Scanpix
Donetsk viloyatidagi Ukraina gospitali
Harbiy shifokorlar ukrainalik askarning yarasini bog‘lamoqda. Donetsk viloyatida faol janglar davom etmoqda. Viloyat harbiy boshqarmasi ma’lumotlariga ko‘ra, 17-noyabr kuni ertalab Rossiya Donetskdan 60 kilometr shimolda Ukraina nazorati ostidagi Chasov Yar shahrini o‘qqa tutgan. Uch kishining o‘limi haqida xabar berilgan. Bundan tashqari, rus qo‘shinlari Bahmut va Ugledarga zarba berishda davom etmoqda.Foto: Reuters
Tibbiyot xodimlari Ukraina Qurolli kuchlarining yaralangan askariga birinchi tibbiy yordam ko‘rsatmoqda.Foto: Reuters
Xersonda vayron qilingan aeroport
Chernobayevka qishlog‘idagi “Xerson” xalqaro aeroporti binosi, uning hududida rus qo‘shinlarining buzilgan harbiy texnikalari qolib ketgan. Urushning birinchi kunlarida Rossiya armiyasi uchun Chernobayevkaning qo‘lga olinishi strategik ahamiyatga ega edi — aeroport 27-fevralda rus harbiylari tomonidan egallandi. O‘shandan beri Ukraina Qurolli kuchlari Chernobayevkadagi Rossiya pozitsiyalariga muntazam va muvaffaqiyatli hujum qildi. 11-noyabr kuni Ukraina Qurolli kuchlari Chernobayevkani ozod qildi.Foto: Anadolu
Aeroport devorida Ukraina Qurolli kuchlari Oliy bosh qo‘mondoni, general Valeriy Zalujniyning surati.Foto: Anadolu
Aeroportda tashlab ketilgan rus istehkomlari.Foto: Anadolu
Chernobayevka aeroporti hududidagi harbiy samolyotlar.Foto: Anadolu
Izoh (0)