Нидерландия Ташқи ишлар вазирлиги Россия элчиси Александр Шулгинни Москванинг Малайзиядаги Boeing MH17 ҳалокати бўйича чиқарилган ҳукмга муносабати сабабли ҳузурига чақиртирди. Бу ҳақда «РИА Новости» хабар берди.
«Россия ўз муносабати билан Нидерландия ҳуқуқий давлатини обрўсизлантиради. Буни мутлақо қабул қилиб бўлмайди', — дейилади Нидерландия ТИВ баёнотида.
17 ноябрда Нидерландия суди икки нафар россиялик Игорь Гиркин (Стрелков) ва Сергей Дубинскийни ҳамда украиналик Леонид Харченкони 2014 йил Malaysia Airlines йўловчи лайнерини ҳалокатга учратганликда айбдор деб топди. Ҳодисада 298 киши ҳалок бўлганди. Айбланувчиларга умрбод қамоқ жазоси тайинланди. Улар қурбонларнинг яқинларига камида 16 миллион евро товон пули тўлаши керак.
Россия президенти матбуот котиби Дмитрий Песков Донбассда Малайзиянинг Boeing самолёти уриб туширилгани бўйича Гаага судининг ҳукми «чуқур таҳлил»ни талаб қилишини айтди.
«Россия олиб борилаётган терговга киритилмаганидан афсусдамиз. Ишончимиз комилки, Россия томонининг бу жараёндан четлатилгани, камида терговнинг холислигига ҳисса қўшмаган. Суд қарорининг ўзига келсак, аввало чуқур таҳлил қилиш зарур», — деган Песков.
Гаага суди 2014 йилда Малайзия Boeing'и уриб туширилганда ўзини ўзи эълон қилган Донецк Россия назорати остида бўлганини таъкидлаганди. Бу ҳудудда рус қуролларидан фойдаланилган, бундан ташқари рус қўшинлари Донбассда жанг қилган. Суд MH17 ҳалокатида «Бук» ҳаво мудофаа тизимидан фойдаланишни Россия билан бевосита алоқадор деб топмади.
Изоҳ (0)