Қирғизистонда Миллий хавфсизлик давлат қўмитаси (МХДҚ) ходимлари томонидан машҳур криминал авторитет Қамчи Колбаев (Қамчибек Асанбек) қўлга олинди, деб ёзади «24.kg».
16 ноябрь куни Иссиқкўл вилоятида махсус хизматлар ходимлари қонундаги ўғри Қамчибек Асанбек ва унинг яқинлари бўлган ўн кишини қўлга олди. Улар Қирғизистон-Хитой чегараси яқинида (Жети-Ўғуз тумани) жойлашган «Булат-М» ов ўрмонзоридан қайтиб келаётганида «Қорасой» чегара пунктида ушланган.
«Текширув чоғида улар чегара ҳудудига Қирғизистон Республикаси давлат органларининг тегишли рухсатномаларисиз келгани аниқланди. Шу муносабат билан, Қирғизистон қонунчилигига мувофиқ, Қ. Асанбек ва унга яқин шахсларга нисбатан маъмурий ҳибс ҳақида тегишли баённомалар расмийлаштирилди. Шунингдек, текширув натижасида саккизта ўточар қурол аниқланди», — дейилади хабарда.
Қамчи Кольбаев ёки Коля-қирғиз Қирғизистонда энг таниқли криминал авторитет ҳисобланади. У Иссиқкўл вилояти фуқаросидир.
2011 йил июнида Колбаев АҚШда расман халқаро наркобизнеснинг бош иштирокчиларидан бири деб тан олинган ва машҳур «Биродарлар доираси» рўйхатига киритилган.
АҚШ Кольбаев ҳақидаги маълумот учун 5 миллион доллар мукофот ваъда қилган
2021 йилда АҚШ Давлат департаменти қирғизистонлик жиноий авторитет Қамчи Кольбаевни ҳибсга олишга ёрдам берадиган маълумот учун мукофот миқдорини беш баравар ошириб, 5 миллион долларга етказган эди.Давлат департаментининг аниқлик киритишича, 2000 йилда Кольбаев жиноий гуруҳ таркибидаги ўзининг собиқ хўжайинини ўлдиришга уриниш ва яна икки кишининг ўлимида айбланиб судланган. Мазкур жиноятлар учун Кольбаев 25 йилга озодликдан маҳрум қилинган, аммо олти йил ўтгач, қамоқдан қочиб кетган. 2008 йилда у Москвада жиноятчиларнинг махфий йиғинида жиноий тўда бошлиғи деб эълон қилинган.
2012 йилда АҚШ махсус хизматлари Кольбаевни дунёдаги энг йирик наркобаронлар рўйхатига киритган. 2017 йилда АҚШ ҳукумати Собиқ Иттифоқ мамлакатларидан ўн нафар жиноий авторитетни «қора рўйхат»га киритган, улар орасида Кольбаев ҳам бор эди. АҚШ ҳудудида «қора рўйхат»даги шахсларнинг шахсий мулклари аниқланган тақдирда, улар хатланади.
АҚШ Молия вазирлиги маълумотларига кўра, «Биродарлар доираси» халқаро жиноий гуруҳига кирувчи Кольбаев порахўрлик, одам савдоси ва бошқа ноқонуний фаолиятлар билан шуғулланган.
Сўнгги марта Кольбаев 2020 йил 22 октябрда Бишкек шаҳрида ҳибсга олинган. 2021 йил, 24 февраль куни Бишкек шаҳрининг Первомайский туман суди Кольбаевни ҳибсда сақлаш муддатини 22 мартгача узайтирди. 2 март куни эса Бишкек шаҳар суди ҳайъати унинг қамоқдан қочиб кетмаслиги бўйича эҳтиёт чораларни ўзгартирди.
Изоҳ (0)