“Daryo” muxbiri O‘zbekiston oila va xotin-qizlar davlat qo‘mitasidan tizimga oid ma’lumot olish maqsadida qo‘mitaga borib, bir nechta noqonuniy to‘siqlarga duch keldi.
Qo‘mita binosining kirish qismida turgan Milliy gvardiya xodimlaridan axborot xizmatida ishim borligini, mas’ullardan birortasini chaqirib berishlarini so‘radim. Ular Nilufar Jumayeva hozir seminarda ekanligi, tez orada chiqib qolishini aytishdi.Paytdan foydalanib, qo‘mita binosini material uchun rasmga olmoqchi bo‘lib turganimda qo‘riqlashda turgan Milliy gvardiya xodimlaridan biri binoni rasmga olish mumkin emasligini aytib, meni to‘xtatishga urindi. Shunda xodimdan avvalo o‘zini tanishtirishini va rasmga olish nima uchun mumkin emasligini so‘radim.
“Rasmga olishga ruxsatnoma bormi? Rasmga olishga ruxsat yo‘q, mumkin emas. Bizga shunday topshiriq bo‘lgan. To‘g‘ri tushuning, menga dakki berishadi. Bu yer sizga park emas, kimdir mushuk o‘ynatmayapti”, — dedi Milliy gvardiya xodimi Ziyodjon Turopov.
Undan qaysi tartibga ko‘ra rasmga olish mumkin emasligini so‘raganimda Milliy gvardiya zobiti javob berolmadi va “mumkin emas” deb turaverdi.
Shu orada yana bir Milliy gvardiya xodimi kelib, nima maqsadda rasmga olayotganimni va bu mumkin emasligini aytdi. Undan ham avval o‘zini tanishtirishini, nimaga asoslanib menga taqiq qo‘yayotganini so‘radim.
“Bizga rahbariyat tomonidan rasmga olish mumkin emasligi aytilgan. Qonunni bilmadim. Biz rahbarlarning buyrug‘iga bo‘ysunamiz. Zulayho Mahkamova bizdan avvalgi yigitlarga shunday topshiriq bergan, biz shuni bajarib kelyapmiz”, — deya javob berdi harbiy soqchi Muhammad Umrzoqov.
Oradan chamasi 10 daqiqa vaqt o‘tgandan so‘ng qo‘riqlashda turgan xodimlar meni chaqirib, kimdir telefonda so‘rayotganini aytdi. Go‘shakni olsam, qo‘mita axborot xizmati rahbari Nilufar Jumayeva ekan. U qo‘mitada emasligi, o‘qishda ekanligini aytib, nima maqsadda kelganimni so‘radi. Unga o‘zimni tanishtirib, savollarimni berdim. U so‘rayotgan ma’lumotlarimni xat orqali yuborishimni aytdi.
“Savollaringizni xat orqali yuboring. Opa shunday topshiriq bergan. Bir-ikki marta og‘zaki javob berganimizda turlicha talqin bo‘lib ketgan. Gap eshitib qolganman. Bu opaning shaxsan topshirig‘i, o‘zimga qolsa, jurnalistlarni yaxshi tushunaman. Lekin opa aytyaptilarki, xat bilan murojaat qilishsin. Siz so‘rayotgan narsalar raqamlar bilan bog‘liq, shuning uchun xat bilan murojaat qilavering”, — dedi axborot xizmati rahbari.
Unga bu tartib qonunga zid ekanligini, og‘zaki murojaat ham yozma murojaatdek bir xil ekanligini aytdim. Nilufar Jumayeva tartib shunday ekanligi, boshqa vazirlik va idoralar ham faqat xat orqali murojaatlarni qabul qilishini qo‘shimcha qildi.
Milliy gvardiya xodimlari binoning tashqi qismini rasmga olishga to‘sqinlik qilishayotganini va buni qo‘mita raisining topshirig‘i, deb tushuntirishganini aytdim.“Shunday, bizga to xat bilan murojaat qilmaguningizcha, ruxsat yo‘q. Endi siz layk yig‘ish uchun videoga olib, axborot xizmati bu qonunga ko‘ra og‘zaki murojaatga javob bermadi, deb yozib chiqmoqchisiz. Biz sizni nima maqsadda rasmga olayotganingizni bilmaymiz-ku”, — deya oxirgi savolimga javob berdi u.
Ushbu masalalar yuzasidan qo‘mita raisi Zulayho Mahkamova bilan uchrashmoqchi bo‘ldim. Aynan shu kuni raisning fuqarolarni qabul qilish kuni ekan. Lekin Zulayho Mahkamova topshiriq bilan Jizzax viloyatiga ketganligi ma’lum qilindi.Ma’lumot uchun, “Jismoniy va yuridik shaxslarning murojaatlari to‘g‘risida”gi qonunning 5-moddasiga ko‘ra, murojaatlar og‘zaki, yozma yoxud elektron shaklda bo‘lishi mumkinligi qayd etib o‘tilgan.
Qonunning 2-moddasida davlat boshqaruvi organlari ushbu qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlashi va ushbu qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlashi ko‘rsatilgan.
Yana bir ma’lumot, O‘zbekiston oila va xotin-qizlar davlat qo‘mitasi binosi toifalangan, ya’ni tasvirga olishga cheklov qo‘yilgan inshoot sirasiga kirmaydi.
Izoh (0)