«Бу ер сизга парк эмас, кимдир мушук ўйнатяптими?» — Оила ва хотин-қизлар қўмитаси раиси Зулайҳо Маҳкамова қонунга зид топшириқ берган, бинони расмга олишни тақиқлаган

«Дарё» мухбири Ўзбекистон оила ва хотин-қизлар давлат қўмитасидан тизимга оид маълумот олиш мақсадида қўмитага бориб, бир нечта ноқонуний тўсиқларга дуч келди.

Қўмита биносининг кириш қисмида турган Миллий гвардия ходимларидан ахборот хизматида ишим борлигини, масъуллардан бирортасини чақириб беришларини сўрадим. Улар Нилуфар Жумаева ҳозир семинарда эканлиги, тез орада чиқиб қолишини айтишди.

Пайтдан фойдаланиб, қўмита биносини материал учун расмга олмоқчи бўлиб турганимда қўриқлашда турган Миллий гвардия ходимларидан бири бинони расмга олиш мумкин эмаслигини айтиб, мени тўхтатишга уринди. Шунда ходимдан аввало ўзини таништиришини ва расмга олиш нима учун мумкин эмаслигини сўрадим.

«Расмга олишга рухсатнома борми? Расмга олишга рухсат йўқ, мумкин эмас. Бизга шундай топшириқ бўлган. Тўғри тушунинг, менга дакки беришади. Бу ер сизга парк эмас, кимдир мушук ўйнатмаяпти», — деди Миллий гвардия ходими Зиёджон Туропов.

Ундан қайси тартибга кўра расмга олиш мумкин эмаслигини сўраганимда Миллий гвардия зобити жавоб беролмади ва «мумкин эмас» деб тураверди.

Шу орада яна бир Миллий гвардия ходими келиб, нима мақсадда расмга олаётганимни ва бу мумкин эмаслигини айтди. Ундан ҳам аввал ўзини таништиришини, нимага асосланиб менга тақиқ қўяётганини сўрадим.

«Бизга раҳбарият томонидан расмга олиш мумкин эмаслиги айтилган. Қонунни билмадим. Биз раҳбарларнинг буйруғига бўйцунамиз. Зулайҳо Маҳкамова биздан аввалги йигитларга шундай топшириқ берган, биз шуни бажариб келяпмиз», — дея жавоб берди ҳарбий соқчи Муҳаммад Умрзоқов.

Орадан чамаси 10 дақиқа вақт ўтгандан сўнг қўриқлашда турган ходимлар мени чақириб, кимдир телефонда сўраётганини айтди. Гўшакни олсам, қўмита ахборот хизмати раҳбари Нилуфар Жумаева экан. У қўмитада эмаслиги, ўқишда эканлигини айтиб, нима мақсадда келганимни сўради. Унга ўзимни таништириб, саволларимни бердим. У сўраётган маълумотларимни хат орқали юборишимни айтди.

«Саволларингизни хат орқали юборинг. Опа шундай топшириқ берган. Бир-икки марта оғзаки жавоб берганимизда турлича талқин бўлиб кетган. Гап эшитиб қолганман. Бу опанинг шахсан топшириғи, ўзимга қолса, журналистларни яхши тушунаман. Лекин опа айтяптиларки, хат билан мурожаат қилишсин. Сиз сўраётган нарсалар рақамлар билан боғлиқ, шунинг учун хат билан мурожаат қилаверинг», — деди ахборот хизмати раҳбари.

Унга бу тартиб қонунга зид эканлигини, оғзаки мурожаат ҳам ёзма мурожаатдек бир хил эканлигини айтдим. Нилуфар Жумаева тартиб шундай эканлиги, бошқа вазирлик ва идоралар ҳам фақат хат орқали мурожаатларни қабул қилишини қўшимча қилди.

Миллий гвардия ходимлари бинонинг ташқи қисмини расмга олишга тўсқинлик қилишаётганини ва буни қўмита раисининг топшириғи, деб тушунтиришганини айтдим.

«Шундай, бизга то хат билан мурожаат қилмагунингизча, рухсат йўқ. Энди сиз лайк йиғиш учун видеога олиб, ахборот хизмати бу қонунга кўра оғзаки мурожаатга жавоб бермади, деб ёзиб чиқмоқчисиз. Биз сизни нима мақсадда расмга олаётганингизни билмаймиз-ку», — дея охирги саволимга жавоб берди у.

Ушбу масалалар юзасидан қўмита раиси Зулайҳо Маҳкамова билан учрашмоқчи бўлдим. Айнан шу куни раиснинг фуқароларни қабул қилиш куни экан. Лекин Зулайҳо Маҳкамова топшириқ билан Жиззах вилоятига кетганлиги маълум қилинди.

Қонуннинг 2-моддасида давлат бошқаруви органлари ушбу қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминлаши ва ушбу қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминлаши кўрсатилган.

Яна бир маълумот, Ўзбекистон оила ва хотин-қизлар давлат қўмитаси биноси тоифаланган, яъни тасвирга олишга чеклов қўйилган иншоот сирасига кирмайди.