Farg‘ona viloyatining Oltiariq tumanidagi 22, 39-sonli bog‘chada bolalar zaharlangani bo‘yicha jinoyat ishi qo‘zg‘atildi. Bu haqda Ombudsman matbuot xizmati xabar qildi.
Ma’lum qilinishicha, sentabrning o‘rtalarida Farg‘ona viloyati Oltiariq tumanidagi 22, 39-sonli va Marg‘ilon shahridagi 16, 24-sonli MTMda tarbiyalanuvchi bolalarning ovqatdan zararlangani holatini bola huquqlari bo‘yicha vakil joyiga chiqib o‘rgangan.
Mazkur holat yuzasidan tahliliy ma’lumot tayyorlanib, yuqoridagi kabi holatlarning oldini olish maqsadida tavsiyalar ishlab chiqilgan va tegishli davlat idoralariga, xususan, Bosh prokuraturaga yuborilgan. Farg‘ona viloyat prokuraturasining ma’lum qilishicha, holat yuzasidan to‘plangan hujjatlar asosida Marg‘ilon shahri va Oltiariq tuman prokuraturasi tomonidan tergovoldi tekshiruv harakatlari o‘tkazilgan.
Xususan, Marg‘ilon shahridagi 16 va 24-sonli davlat maktabgacha ta’lim tashkilotlarida 18 nafar tarbiyalanuvchining oziq-ovqat mahsulotlaridan zaharlanganlik holati yuzasidan to‘plangan hujjatlar o‘rganilib, mazkur holatda biror-bir shaxsning harakatlarida jinoyat alomatlari mavjud bo‘lmagan, degan sabab bilan 18-oktabr kuni shahar prokuraturasi tergovchisi tomonidan jinoyat ishini qo‘zg‘atishni rad etish haqida qaror qabul qilingan.
Biroq mazkur qaror ishi hujjatlari bo‘yicha to‘liq tekshiruv harakatlari olib borilmasdan, barvaqt qabul qilinganligi aniqlanib, 26-oktabr kuni jinoyat ishi qo‘zg‘atishni rad etish haqidagi qaror bekor qilinib, qo‘shimcha tergovga qadar tekshirish harakatlarini olib borish uchun tuman IIB TBga yuborilgan.
22 hamda 39-sonli davlat maktabgacha ta’lim tashkilotida to‘plangan hujjatlar asosida o‘tkazilgan sud-tibbiy ekspertizasining xulosalariga ko‘ra, 45 nafar tarbiyalanuvchi oziq-ovqat va sut mahsulotidan yengil darajali o‘tkir zaharlanishi, bu belgi yengil shikastlar toifasiga kirishi aniqlangan.
Yuqoridagilarga ko‘ra, tumandagi 22 hamda 39-sonli davlat maktabgacha ta’lim tashkilotida sanitariyaga oid qonunchilikning buzilishi odamlarning ommaviy kasallanishi va zaharlanishiga olib kelganligi sababli 14-oktabr kuni Oltiariq tuman prokuraturasi tomonidan Jinoyat kodeksining 257-1-moddasi 1-qismi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan.
Hozirda mazkur jinoyat ishi yuzasidan Oltiariq tumani IIB Tergov bo‘limi tomonidan dastlabki tergov harakatlari olib borilmoqda.
Izoh (0)