O‘zbekistonda xizmat ko‘rsatgan artist Behzod Muhammadkarimov “Omon-omon” ko‘rsatuviga bergan intervyusida “O‘tkan kunlar” filmidagi Otabek roli uchun 15 kunda 20 kiloga ozgani, “Qodirxon” serialidagi roli va uning muvafaqqiyatli chiqishini kutmagani haqida gapirdi.
“Senga mo‘ylov qo‘ygandik, Abdulla Qodiriyga o‘xshab qolding, deyishgan”
“O‘tkan kunlar” filmining ikkinchi talqini suratga olinishi kerak bo‘lgan paytda vazn orttirgan edim. Keyin marhum rejissorimiz Melis Abzalov bu film suratga olinmasidan 10 yil oldin Otabek roliga taklif qilgan edi. Otabek rolini 34 yoshimda o‘ynaganman, 24 yoshimda taklif qilgan ekan. Otabek roliga tayyorlanib yur, qayta-qayta o‘qib chiq, degandi. Men esa yuzaki qaraganman. Shu yil davomida harakat qilib filmni suratga olishga erishgan. O‘n yil o‘tib, meni chaqirdi. Bilmadim, mendan boshqa insonni bu rolda ko‘rolmagan.
Vazn orttirganman, meni hech kim Otabek deb o‘ylamas edi. Baribir chaqirdi, bordim. Birinchi foto, keyin kino sinovida qatnashdim. Shu bilan o‘tolmasligimni bildim, chunki o‘zimni shu rolda ko‘rolmaganman. Keyin chaqirib, menga roldan o‘tganimni, vazn tashlashim kerakligini aytishdi.
Melis akamga filmni ikkinchi marta olish shartmi, dedim. Melis akam esa bu asarga qayta-qayta yondashish mumkinligini aytdi. O‘ylab qarasam, haqiqatan to‘g‘ri. So‘ngra Otabekning yoshi 24 da bo‘lganini, meniki esa 34 daligini aytdim. Bunga ham gap topib berdilar. U vaqtda insonlar vaqtli ulg‘aygan, dedi. Senga mo‘ylov qo‘ygandik, Abdulla Qodiriyga o‘xshab qolding, deyishdi.
Abdulla Qodiriy esa Otabek sifatida o‘zini tasvirlagan, hatto bu rol sahnalashtirilsa, o‘zim o‘ynayman, degan gaplar ham bo‘lgan. Shu bilan menga imkon qoldirishmadi. Keyin xuddi sportchilar musobaqaga tayyorlangandek harakat qildim. Yeydigan ovqatimni uch barobar kamaytirdim, harakatimni esa uch barobarga ko‘paytirdim. Mehmonxonada yashagan bo‘lsak, birinchi qavatdan to‘rtinchi qavatga qayta-qayta tushib chiqqanman, yugurardim. Oson bo‘lmas ekan, sillam qurib qolardi. Uyga kelganimda turmush o‘rtog‘im ham qarab, faqat suyagingiz qolibdi-ku, degan. Shu bilan 15 kunda 20 kiloga ozganman, mazam qochib qolgan.
“Qodirxon” serialidagi qahramonimga o‘xshashga harakat qilib yuribman
To‘g‘risini aytsam, “Qodirxon” serialidagi qahramonimga o‘xshashga harakat qilib yuribman. Farqlashda ham tashqarida turgan insonlar bunga qarab baho bera oladi. Aktyorlikda shunaqa jihat borki, bir rolni o‘ynagandan keyin o‘sha rolga hayotda ham munosib bo‘lib yurish kerak bo‘ladi. Ko‘rgan inson bu hayotda va filmda boshqacha ekan, degan fikr uyg‘onadi.
Aktyor “Qodirxon” serialidagi roli va uning muvaffaqiyatli chiqishini kutmagani haqida
“Qodirxon” serialida suratga tushgunimga qadar ham ko‘p rollarni ijro etganman, serialni oddiy loyiha deb qabul qilganman. Keyin birdan boshqacha tus olib ketdi, reyting bo‘yicha birinchi o‘ringa chiqdi. Nafaqat men, balki prodyuser, rejissor, aktyor va aktrisalar ham hamma hayron qoldi. Chunki hamma buni shunchaki oddiy loyiha, har kunlik qiladigan ishimiz deb yondashgan.
Bu kutilmagan, quvonchli holat. Masalan, boshqa kino va seriallarda o‘z rolim kuchliroq tuyulgan, shu vaqtgacha meni ko‘rganlar Elchin deyishar edi, hozir Qodirxon deyishyapti. Elchindan keyin boshqasi “bosmagan” edi.
Mavzuga doir:
- “Amerikada yillab quyoshni ko‘rmay ishlardim”. Behzod Muhammadkarimov AQShda mardikorlik qilgan kunlarini esladi (video).
- “Bu oydan, u oyga qarz bo‘lib o‘tardim”. Behzod Muhammadkarimov kinoni tashlab, AQShga ketish sababini ma’lum qildi (video).
- Behzod Muhammadkarimov “Shaytanat” va “Amir Temur” seriallaridagi roli uchun qancha gonorar olganini ma’lum qildi (video).
Izoh (0)