O‘zbekiston xalq artisti Erkin Komilov xalq ardog‘idagi marhum aktyor Shukur Burhonovning shogirdi bo‘lgani, teatr institutiga kirishi, marhum rafiqalari, o‘zi ta’sirlanib o‘ynagan roli qaysi ekani, qanday insonlardan nafratlanishi haqida gapirdi.
Erkin Komilov teatr oliygohiga kirishdagi qiyinchiliklari haqida
1964-yili Toshkent teatr va rassomchilik institutiga kelganimda, 244 kishi hujjat topshirgan edi, keyin esa drama mahorati yo‘nalishiga 11 kishini olishini eshitganman. Yuragim shuv etgan, bir qarasam sochlari taqimini o‘pgan Gulchehra Jamilova, Gulya Muhammedova, Karomat, Lola bor bo‘lgan, bolalarning hammasi baquvvat. Men esa qishloqdan kelganman, shayton “hujjatingni olib ket”, rahmon esa “to‘xta”, degan. Keyin kirib ijroni topshirib chiqdim, ikkita imtihon bo‘lardi, ikki marta “elanardi”.
Birinchi imtihondan keyin 33 kishi qoldik, qarasam familiyam turibdi, xursand bo‘ldim. Ikkinchi marta yana kirdim, shundan so‘ng 11 kishining orasidan 7-bo‘lib turibman. Shunday qilib imtihondan o‘tib ketganman. Institutda o‘qib yurgan paytlarimiz, 1966-yili yer qimirladi, shunda O‘zbekiston xalq artisti Toshxo‘ja Xo‘jayev meni, Gulchehra Jamilova, Hojiakbar Nurmatov, uchalamizni ishga olgan. O‘sha payt biz uchinchi kursda o‘qir edik.
“Shukur Burhonovning nigohiga tushdim, uyiga borganimda faqat san’at va teatr haqida gaplashar edik”
Qandaydir Shukur Burhonovning nigohiga tushgan ekanman, nima bo‘lsa oting nima, derdilar, Erkin desam, mashinaga o‘tir, derdilar. Uyga borardik, o‘zi bilan yaqin olib yurardi. “Hamza” teatrida o‘qib yurgan paytlarimda borganimda “Mirzo Ulug‘bek” teatrini ko‘rganman. Shu payt birinchi teatrga tushishim edi.
Shukur akaning iste’dodiga hayratomuz boqqanman, keyin shu inson hayotda qanaqa ekan, deb teatr katta darvozasining oldida kutib turganman. Yomg‘ir savalab yog‘ib turgan edi, “Moskvich” mashinasida, gruzincha bosh kiyimni kiyib chiqib kelgan. Salom berganman, alik olib ketgan, shu bilan ko‘rinmay ketguncha orqasidan qarab turganman.
Keyin shu insonning nigohiga tushdim, uyiga borganimda faqat san’at va teatr haqida gaplashar edik. To‘g‘ri, o‘sha paytda men qishloq farzandi bo‘lganim uchun yerlarni chopib, nima ish bo‘lsa, yo‘q demasdan shuni qilar edim. Toza ish qilganim uchun ham Shukur aka meni yoqtirib qolgan. Ularning yonida yurib, sahnadagi odob-qoidalarni o‘rganardik. Suratga olish ishlarining tayyorgarlik jarayonlariga vaqtida kelishni, sahnada qanday yurishni, kattaga hurmat, kichikka izzat qilishni, garchi bizga aytmagan bo‘lishsa ham, shularni ko‘rib o‘rnak olganmiz.
“Hozirgi ayolim Mahbubaning bahosi yo‘q, menga qaraydi, vrachim ham, oshpazim ham Mahbuba”
Fotima va Zuhra qizlarimning onasi yurak xuruji bilan 24 yoshida vafot etgan. Bolalar menda qolib ketdi, u kunlar o‘tdi. Keyin ustozim Shukur Burhonovning yordami bilan bolalar teatrida ishlaydigan Mo‘tabar ismli bir qizga uylandim. Alloh farzandlar berdi, 44 yoshida u ham vafot etdi. Besh qizimni o‘zim uzatdim, o‘g‘illarimni to‘y qildim.
Undan keyin bari bir erkak kishi uylanmasa bo‘lmas ekan, uyning ishlari, o‘zim ko‘chada yursam, ovqat, dazmol qilish degandek, ayol kishi erkakni orqasida qolgani yaxshi ekan. O‘zimdan o‘tganini o‘zim bilaman, mana hozir hech narsani ko‘rmagandek bo‘lib ketdim. Hozirgi ayolim Mahbubaning bahosi yo‘q, menga qaraydi, vrachim ham, oshpazim ham Mahbuba.
“Shifokorlarni chaqirishgan, ukol qilgandan keyin o‘zimga kelganman, tamoman o‘zimdan chiqib ketgan ekanman”
“Girdob” spektakli qo‘yilgan vaqtda bir sahnasi bor edi, Muhammad chatoq Aziz Qosimovning oldiga keladi. Men sizni aqlli bola deb yursam, sizning aqlingiz yo‘q ekan-ku, deydi. U esa nimagaligini so‘raydi, Muhammad esa kelinimni xafa qilib, nimaga uydan chiqib ketdingiz, deb aytadi. Aziz ichiga oladi, so‘ramang, Muhammad aka, deydi. Chunki unga Saltanat Yo‘ldosh bilan birga xiyonat qilganini aytganda, kostyumini yelkasiga oladi va yotoqxonadan chiqib ketadi.
Aziz Qosimov qayerga ketayotganini bilmaydi. U shuning uchun aytmaydi, birovga aytmayman deb qasam ichganman, bu birovga aytadigan gap emas, deydi. Shu payt ichimdan bir narsa keldi, suratga olish jarayonlari bo‘lyapti, o‘zimni bilmay qolganman. Shifokorlarni chaqirishgan, ukol qilgandan keyin o‘zimga kelganman, tamoman o‘zimdan chiqib ketgan ekanman. Shunday narsa bo‘lgan.
“Tamagir insonlarni yoqtirmayman, birovga yaxshi ko‘rinish uchun hamma narsani ichiga yutish ham yaxshi emas”
Shunday narsalar bo‘ladiki, kechirib bo‘lmaydi. Kechirdim deganingizda ham, vijdoningiz qiynab turadi. Erkak kishi ayol kishiga qo‘l ko‘tarishi yaxshi ish emas, qo‘limni urib qo‘ltig‘imga urdim, deyiladi. Riyokor, tovlamachi, birovni haqqidan qo‘rqmaydigan insonlar bor, shunday dorilamon zamonda noliydigan odamlar bor, shulardan nafratlanaman. Shularni yomon ko‘raman.
Tamagir insonlarni yoqtirmayman, birovga yaxshi ko‘rinish uchun hamma narsani ichiga yutib ketish ham yaxshi emas. Ko‘plab insonlarni ko‘rdik, ko‘ryapmiz. Ota-ona, ustozning duosini olganini ham, olmaganini ham ko‘ryapman. Kimda g‘am yo‘q, hammada tashvish bor.
Mavzuga doir:
- Instagram: Qimmatbaho mashina xarid qilgan Ziyoda, 61 yoshida o‘g‘illi bo‘lgan Erkin Komilov, jurnalist tug‘ilgan kunida jam bo‘lgan yulduzlar.
- “Kim qilganini Yodgor biladi, men ham bilaman”. Erkin Komilov “Shaytanat”ning nima uchun “zapret”ga tushgani haqida gapirdi (video).
- Erkin Komilov Islom Karimov haqidagi xotiralari bilan bo‘lishdi (video).
- Erkin Komilov: Onam yigirma ikki farzandni dunyoga keltirgan, men o‘n to‘qqizinchisiman.
Izoh (0)