Беҳзод Муҳаммадкаримов «Ўткан кунлар»даги роли учун 15 кунда 20 килога озгани, «Қодирхон»даги образи муваффақиятига ишонмагани ҳақида (видео)

Ўзбекистонда хизмат кўрсатган артист Беҳзод Муҳаммадкаримов «Омон-омон» кўрсатувига берган интервьюсида «Ўткан кунлар» фильмидаги Отабек роли учун 15 кунда 20 килога озгани, «Қодирхон» сериалидаги роли ва унинг мувафаққиятли чиқишини кутмагани ҳақида гапирди.

«Сенга мўйлов қўйгандик, Абдулла Қодирийга ўхшаб қолдинг, дейишган»

«Ўткан кунлар» фильмининг иккинчи талқини суратга олиниши керак бўлган пайтда вазн орттирган эдим. Кейин марҳум режиссёримиз Мелис Абзалов бу фильм суратга олинмасидан 10 йил олдин Отабек ролига таклиф қилган эди. Отабек ролини 34 ёшимда ўйнаганман, 24 ёшимда таклиф қилган экан. Отабек ролига тайёрланиб юр, қайта-қайта ўқиб чиқ, деганди. Мен эса юзаки қараганман. Шу йил давомида ҳаракат қилиб фильмни суратга олишга эришган. Ўн йил ўтиб, мени чақирди. Билмадим, мендан бошқа инсонни бу ролда кўролмаган.

Вазн орттирганман, мени ҳеч ким Отабек деб ўйламас эди. Барибир чақирди, бордим. Биринчи фото, кейин кино синовида қатнашдим. Шу билан ўтолмаслигимни билдим, чунки ўзимни шу ролда кўролмаганман. Кейин чақириб, менга ролдан ўтганимни, вазн ташлашим кераклигини айтишди.

Мелис акамга фильмни иккинчи марта олиш шартми, дедим. Мелис акам эса бу асарга қайта-қайта ёндашиш мумкинлигини айтди. Ўйлаб қарасам, ҳақиқатан тўғри. Сўнгра Отабекнинг ёши 24 да бўлганини, меники эса 34 далигини айтдим. Бунга ҳам гап топиб бердилар. У вақтда инсонлар вақтли улғайган, деди. Сенга мўйлов қўйгандик, Абдулла Қодирийга ўхшаб қолдинг, дейишди.

Абдулла Қодирий эса Отабек сифатида ўзини тасвирлаган, ҳатто бу рол саҳналаштирилса, ўзим ўйнайман, деган гаплар ҳам бўлган. Шу билан менга имкон қолдиришмади. Кейин худди спортчилар мусобақага тайёрлангандек ҳаракат қилдим. Ейдиган овқатимни уч баробар камайтирдим, ҳаракатимни эса уч баробарга кўпайтирдим. Меҳмонхонада яшаган бўлсак, биринчи қаватдан тўртинчи қаватга қайта-қайта тушиб чиққанман, югурардим. Осон бўлмас экан, силлам қуриб қоларди. Уйга келганимда турмуш ўртоғим ҳам қараб, фақат суягингиз қолибди-ку, деган. Шу билан 15 кунда 20 килога озганман, мазам қочиб қолган.

«Қодирхон» сериалидаги қаҳрамонимга ўхшашга ҳаракат қилиб юрибман

Тўғрисини айтсам, «Қодирхон» сериалидаги қаҳрамонимга ўхшашга ҳаракат қилиб юрибман. Фарқлашда ҳам ташқарида турган инсонлар бунга қараб баҳо бера олади. Актёрликда шунақа жиҳат борки, бир ролни ўйнагандан кейин ўша ролга ҳаётда ҳам муносиб бўлиб юриш керак бўлади. Кўрган инсон бу ҳаётда ва фильмда бошқача экан, деган фикр уйғонади.

Актёр «Қодирхон» сериалидаги роли ва унинг муваффақиятли чиқишини кутмагани ҳақида

«Қодирхон» сериалида суратга тушгунимга қадар ҳам кўп ролларни ижро этганман, сериални оддий лойиҳа деб қабул қилганман. Кейин бирдан бошқача тус олиб кетди, рейтинг бўйича биринчи ўринга чиқди. Нафақат мен, балки продюсер, режиссёр, актёр ва актрисалар ҳам ҳамма ҳайрон қолди. Чунки ҳамма буни шунчаки оддий лойиҳа, ҳар кунлик қиладиган ишимиз деб ёндашган.

Бу кутилмаган, қувончли ҳолат. Масалан, бошқа кино ва сериалларда ўз ролим кучлироқ туюлган, шу вақтгача мени кўрганлар Элчин дейишар эди, ҳозир Қодирхон дейишяпти. Элчиндан кейин бошқаси «босмаган» эди.

Мавзуга доир:

• «Америкада йиллаб қуёшни кўрмай ишлардим». Беҳзод Муҳаммадкаримов АҚШда мардикорлик қилган кунларини эслади (видео).
• «Бу ойдан, у ойга қарз бўлиб ўтардим». Беҳзод Муҳаммадкаримов кинони ташлаб, АҚШга кетиш сабабини маълум қилди (видео).
• Беҳзод Муҳаммадкаримов «Шайтанат» ва «Амир Темур» сериалларидаги роли учун қанча гонорар олганини маълум қилди (видео).