Mudofaa vazirligi mas’uli marhum askar xizmatga sog‘lom kelganini, yuragidagi o‘simta 8 oylik xizmati davomida paydo bo‘lganini ma’lum qildi

Surxondaryo viloyatining Termiz shahridagi harbiy qismlarning birida xizmat qilgan 18 yoshli marhum yigit xizmatga kelgan paytda sog‘lom bo‘lgani, sakkiz oylik xizmati davomida yurak kasalligini orttirgan bo‘lishi mumkinligi ma’lum qilindi. Bu haqda Mudofaa vazirligining tibbiy ta’minot boshqarmasi boshlig‘i Bahodir Abdulahatov ishtirokidagi matbuot anjumanida so‘z bordi.

Marhum yigit armiyaga chaqirilayotgan vaqtda Mudofaa ishlari bo‘limida tibbiy tekshiruvdan o‘tkazilgan. Unda bunday o‘sma alomatlari bo‘lmagan. Biz marhumning barcha tibbiy kartalarini tekshirib ko‘rdik. U yerda hech qanday o‘sma alomatlari yo‘q. Fakt shundaki, askar yigit kelgan vaqtida hududiy tibbiy komissiyada hamda viloyat Mudofaa ishlari boshqarmasidagi harbiy tibbiy komissiyadan o‘tganda soppa-sog‘ bo‘lgan, — dedi Mudofaa vazirligining tibbiy ta’minot boshqarmasi boshlig‘i Bahodir Abdulahatov.

Bahodir Abdulahatov jurnalistning marhum yigit o‘limiga sabab bo‘lgan o‘simta sakkiz oylik xizmati davomida orttirgan bo‘lishi mumkinmi, degan savoliga “ha, paydo bo‘lgan bo‘lishi mumkin”, deya javob berdi.

Mavzuga doir:

•  “Bizdagi jarroh xususiy klinikalarda ham faoliyat yuritadi”. Mudofaa vazirligi askar yigit harbiy gospitalda emas, xususiy klinikada operatsiya qilinganiga izoh berdi
• “Tig‘ deyilayotgani — operatsiyada orttirilgan izlar”. Mudofaa vazirligi marhum askar yaqinlarining savoliga javob berdi