Surxondaryo viloyatining Termiz shahridagi harbiy qismlarning birida xizmat qilgan 18 yoshli askar o‘limidan avval harbiy gospitalda emas, xususiy klinikada operatsiya qilinishining sababi ochiqlandi. Bu haqda bugun AOKAda Mudofaa vazirligining tibbiy ta’minot boshqarmasi boshlig‘i Bahodir Abdulahatov ishtirokidagi matbuot anjumanida so‘z bordi.
Matbuot anjumanida so‘z olgan “Kun.uz” muxbiri Jamshid Niyozov vazirlik mas’ullariga yuzlanib, askar yigit o‘limidan avval harbiy gospitalda emas, xususiy klinikada operatsiya qilinishining sababi bilan qiziqdi.Jarrohlik amaliyoti nega aynan harbiy gospitalda emas, xususiy klinikada amalga oshirildi. Hozirgi matbuot anjumanida Mudofaa vazirligining tibbiy ta’minoti juda yaxshi ekani, 98 turdagi zamonaviy tibbiyot uskunalari olib kelingani aytilmoqda. Xo‘sh, unda nega xususiy klinikaga ehtiyoj tug‘ildi, — dedi Jamshid Niyozov.
Bizda ishlovchi kardiojarroh Rustam Yarbekov ismli professorimiz to‘rtta klinikada ham ishlaydi. Shu bois biz o‘zimizning tekshiruvimizdan so‘ng, malakali mutaxassisga ko‘rsatish uchun bemorni ularga olib bordik. Bizning dastlabki xulosamiz tasdiqlandi. Biz tashxis qo‘yib, amaliyotga tayyor edik. Tekshiruvdan so‘ng shifokorimiz “Yuragidagi tromb ko‘chib ketadigan bo‘lsa, to‘satdan o‘lim holati yuz berishi mumkin. Shu bois bemorni qimirlatishga ham ruxsat bermayman. O‘zim jarrohlik amaliyotini o‘tkazib, trombini olib tashlaymiz”, deb xulosa qilganini aytdi. Shundan so‘ng bemor yuragidagi tromb olib tashlandi, — deydi Bahodir Abdulahatov.
Mas’ullarning aytishicha, bemorda operatsiyadan so‘ng, ertasi kuni soat 8 larda yurak to‘xtab qolishi kuzatilgan.
Bemorga ko‘rsatilgan yordamlar natija bermaganligi sababli soat 8 larda bemorda biologik o‘lim yuz berdi, — deydi harbiy shifokor.
Izoh (0)