Охирги уч йил ичида Сурия, Ироқ ва Афғонистонда оғир аҳволга тушиб, чорасиз қолган 438 нафар аёл ва болалар Ўзбекистонга олиб келинган. Бу ҳақда Сенат раиси Танзила Норбоева Ўзбекистон Бола ҳуқуқлари тўғрисидаги конвенцияга қўшилганининг 30 йиллигига бағишланган давра суҳбатида маълум қилди, дея хабар бермоқда «Дарё» мухбири.
Бугун (16 ноябрь) Сенатда ўтказилган ва UNICEF, БМТ, парламент ҳамда ҳукумат вакиллари иштирок этган мулоқотда Танзила Нобоева «Меҳр» операцияси доирасида бажарилган ишларга тўхталди.
Ўзбекистоннинг оналар ва болалар ҳуқуқларини ҳимоялашдаги қатъий позициясини кейинги 3 йилда давлат раҳбари бошчилигида амалга оширилган биргина «Меҳр» операцияси ҳам тасдиқлайди. Бугунги кунга қадар ўтказилган «Меҳр-1, 2, 3, 4» операциялари доирасида Сурия, Ироқ ва Афғонистонда оғир аҳволга тушиб, чорасиз қолган 438 нафар аёл ва болалар мамлакатимизга олиб келинди. Ўтган 2021 йилда ҳамкор давлатлар кўмаги билан амалга оширилган «Меҳр-5» операцияси туфайли Сурияда уч йилдан ортиқ вақт давомида ушлаб турилган 24 нафар аёл ҳамда 69 нафар бола Ўзбекистонга қайтарилди. Уларнинг жамиятга интеграцияси учун барча шарт-шароитлар яратилди.Танзила Норбоева болалар соғлигини сақлаш бўйича давлат томонидан бажарилаётган ишлар ҳақида ҳам гапирди.
«Ёшларни қўллаб-қувватлаш ва аҳоли саломатлигини мустаҳкамлаш йили» давлат дастури доирасида республика бўйича 3-4 ёшдаги барча болаларни полиомиелит касаллигига ва 12-13 ёшдаги барча ўсмир қизларни саратонига қарши эмлаш ишлари учун 1 миллион доллар маблағ йўналтирилди. Шунингдек, нейросенсор карлик ёки заиф эшитадиган болаларда кохлеар имплантатлардан фойдаланган ҳолда операциялар ўтказилди.
Ижтимоий ҳимояга муҳтож болаларнинг таълим олиши ва касб эгаллашига кўмаклашиш, оғир касалликка чалинган болаларни даволаш мақсадида Болаларни қўллаб-қувватлаш фонди ташкил этиш ҳамда унинг мақсадлари амалга оширилишини молиялаштириш учун давлат бюджетидан 100 миллиард сўм ажратилди», – деди парламент юқори палатаси раҳбари.
Изоҳ (0)