14-noyabr kuni Sirdaryo viloyatida “Koreya—O‘zbekiston” biznes assotsiatsiyasining vakolatxonasi ochildi, deb xabar bermoqda “Dunyo” axborot agentligi.
Qayd etilishicha, ochilish marosimida vakolatxona o‘zaro iqtisodiy hamkorlikni yo‘lga qo‘yishga, loyihalarni amalga oshirish, koreyalik va sirdaryolik tadbirkorlarga muloqot maydoni yaratish ishlariga xizmat qilishi ta’kidlangan.
“Ayni damda hayajonimni yashira olmayapman. Mazkur vakolatxonaning ochilishi meni juda quvontirdi. Shu bilan birga, mas’uliyatimni ham ikki karra oshirdi. Va’da berib aytamanki, ikki tomonning ishbilarmon doiralari o‘rtasidagi munosabatlarga yangi mazmun olib kirish, ularni turli sohalarga doir aniq loyiha va dasturlar bilan boyitishga astoydil kirishaman”, — deydi assotsiatsiya direktorlar kengashining raisi Kim Chang Keon.
Shu yerning o‘zida Guliston va Pyontek shaharlari hokimlari o‘rtasida uchrashuv bo‘lib o‘tgan. Unda viloyat markazi infratuzilmasini yaxshilash, maktabgacha ta’lim sohasida boshlangan hamkorlik aloqalari istiqbollari haqida fikr almashilgan. Shundan so‘ng delegatsiyani viloyat rahbari G‘ofurjon Mirzayev qabul qilgan.
Muloqot chog‘ida mamlakatlar o‘rtasidagi strategik sheriklik va ko‘p qirrali hamkorlik izchil rivojlanib borayotgani qayd etilgan. Sirdaryo viloyati va Janubiy Koreya hududlari o‘rtasida savdo-iqtisodiy, moliyaviy-investitsiyaviy, innovatsiya va gumanitar, shu jumladan, ta’lim va sog‘liqni saqlash sohalaridagi o‘zaro manfaatli hamkorlikni chuqurlashtirish istiqbollari muhokama qilingan. Pyontek shahri hokimi Chan Chjon Son keng ko‘lamli, ko‘p formatli sheriklikni kengaytirish va mustahkamlashdan manfaatdor ekanini alohida ta’kidlagan.
Yakunda tomonlar o‘rtasida muhokama qilingan masalalar yuzasidan anglashuv memorandumi imzolangan.
Sayxunobod tumanidagi “Poly Tex Sirdaryo” paxta-to‘qimachilik klasteri faoliyati bilan tanishuvdan so‘ng Janubiy Koreya delegatsiyasining Sirdaryo viloyatiga ikki kunlik tashrifi nihoyasiga yetgan.
Izoh (0)