Ijtimoiy tarmoqlarda Surxondaryoda noma’lum shaxslar o‘lgan bo‘rini daraxtga osib, terisini shilib olayotgani aks etgan video tarqalgandi. Mazkur holat Surxondaryo viloyati Ekologiya va atrof-muhitni muhofaza qilish boshqarmasi hamda Milliy gvardiya boshqarmasi xodimlari tomonidan joyiga chiqib o‘rganildi.
O‘rganish davomida ushbu holat Surxondaryo viloyati Sariosiyo tumani “Sangardak ” mahallasida yashovchi fuqaro T. F. tomonidan sodir etilgani ma’lum bo‘ldi.
Fuqaro T.F bu harakati bilan “Hayvonot dunyosini muhofaza qilish va undan foydalanish to‘g‘risida”gi qonunning 42-moddasi va “Ov qilish va ovchilik xo‘jaligi to‘g‘risida”gi qonunning 17,27-moddalari (yovvoyi hayvonlardan ularning yashash faoliyati mahsulotlarini olish maqsadida foydalanish) talabini buzganligi sababli unga nisbatan Ma’muriy javobgarlik to‘g‘risidagi kodeksning 90-moddasi 1-qismi (ov qilish, hayvonot dunyosidan foydalanishning boshqa turlarini amalga oshirish qoidalarini buzish) bilan BHMning 10 baravari — 3 million so‘m miqdorida jarima belgilandi.
Shundan so‘ng bu kabi holatlar yana sodir etilmasligi uchun “Sangardak” mahallasi aholi vakillari bilan profilaktik suhbatlar o‘tkazilib, ularga tabiiy muhitda yashayotgan yovvoyi hayvonlarni ovlash, ularga ziyon yetkazish tegishli qonunlarga asosan javobgarlikka tortilishi batafsil tushuntirildi.
Izoh (0)