Tanzila Norboyeva Misrning Qohira shahrida 22 ta arab davlatlarini birlashtirgan Arab davlatlari parlamentlari ligasi raisi Odil al-Asumiy bilan uchrashdi.
Senat matbuot xizmatining ma’lum qilishicha, uchrashuvda O‘zbekiston parlamentining arab davlatlari parlamentlari, xususan, arab davlatlari parlamentlari ligasi bilan hamkorlikni yanada faollashtirish masalalari muhokama qilindi.
Tanzila Norboyeva O‘zbekiston parlamenti va Arab parlamenti o‘rtasidagi hamkorlikni mustahkamlash maqsadida o‘zaro anglashuv memorandumini imzolash taklifini qo‘llab-quvvatlab, O‘zbekiston Arab mamlakatlari bilan barcha sohalarda o‘zaro do‘stlik va manfaatli munosabatlarni sifat va mazmun jihatdan rivojlantirishga tayyor ekanini bildirdi.
O‘z navbatida Odil al-Asumiy Arab davlatlari uyushmasi, jumladan, Arab parlamenti O‘zbekistonning Markaziy Osiyodagi yetakchi o‘rnini e’tirof etgan holda, O‘zbekiston bilan barcha sohalarda, xususan parlamentlararo hamkorlikni yanada faollashtirishga tayyorligini qayd etdi. Xususan, arab ishbilarmonlari doiralari ishtirokida O‘zbekistonda yirik iqtisodiy forum o‘tkazish taklifi ilgari surildi.
Muloqot chog‘ida O‘zbekistonning qishloq xo‘jalik mahsulotlarini arab davlatlariga eksport qilish va bunda transport logistika masalalarini samarali hal etish choralari ham muhokama qilindi.
O‘zbekistonda gender tenglikni ta’minlash borasida olib borilayotgan davlat siyosatining yuqori samarasi e’tirof etilgan holda, 2023-yil Samarqand shahrida Arab va musulmon mamlakatlari parlamentlari ayol a’zolarining birinchi forumini o‘tkazish tashabbusi ilgari surildi.
Mavzuga doir: Tanzila Norboyeva Misr Senati raisi bilan faol hamkorlikni rivojlantirish masalalarini muhokama qildi
Izoh (0)