Буюк Британиянинг Кембриж университети олимлари экспедиция давомида Қирғизистонда лоланинг янги ва ноодатий турини аниқлади. Маълумот университет сайтида эълон қилинди.
Узунлиги 10 дан 19 сантиметргача бўлган ўсимлик тоғли Тўқтўғил ҳудудида топилган, шунинг учун унга Тўқтўғул (тулипа toktogulica) номи берилган. Олимлар гуруҳига Кембриж университети ботаника боғи куратори Сем Брокингтон, Ўсимлик ва ҳайвонот дунёсини сақлаш халқаро ассоциацияси тадқиқотчиси Дэвид Гилл, Қирғизистон Миллий фанлар академиясининг лола бўйича мутахассислари киритилган. Бу лолаларнинг қандай ривожлангани ва уларни табиий муҳитда қандай қилиб яхши сақлашни тушунишга қаратилган лойиҳанинг бир қисми ҳисобланади.
«Мазкур кашфиёт жуда ҳаяжонли бўлди. Даставвал қизил чизиқли ташқи гулбарглари билан ёрқин сариқ кўринишдаги ёввойи лола бошқа ўсимлик турларга ўхшарди. Бироқ Кембриж университетининг ўсимликшунослик факультетида ўтказилган ДНК тести бу лолаларнинг янги тури эканини тасдиқлади», — дейди экспедиция аъзоси, Кембриж фанлари доктори Бретт Уилсон.
Олимларнинг таъкидлашича, лоланинг янги тури қўриқлаш мақомини олган ва энди уни Ботаника боғида уруғлардан кўпайтиришга ҳаракат қилинади, бу бир неча йил давом этиши мумкин.
Аввалроқ Мьянмадаги қаҳрабо қазиб олинадиган кондан топилган қатрон бўлаги ичида фанга номаълум гул аниқланганди. Топилма Бўр давридаги гулли ўсимликларнинг Valviloculus турига киритилган, нави эса pleristaminis. Топилган гул чанглатувчи бўлиб, у элликка яқин чанг найчаларига эга. Уларнинг ҳар бири чанглатгич ва ингичка ипдан иборат.
Изоҳ (0)