Танзила Норбоева Мисрнинг Қоҳира шаҳрида 22 та араб давлатларини бирлаштирган Араб давлатлари парламентлари лигаси раиси Одил ал-Асумий билан учрашди.
Сенат матбуот хизматининг маълум қилишича, учрашувда Ўзбекистон парламентининг араб давлатлари парламентлари, хусусан, араб давлатлари парламентлари лигаси билан ҳамкорликни янада фаоллаштириш масалалари муҳокама қилинди.
Танзила Норбоева Ўзбекистон парламенти ва Араб парламенти ўртасидаги ҳамкорликни мустаҳкамлаш мақсадида ўзаро англашув меморандумини имзолаш таклифини қўллаб-қувватлаб, Ўзбекистон Араб мамлакатлари билан барча соҳаларда ўзаро дўстлик ва манфаатли муносабатларни сифат ва мазмун жиҳатдан ривожлантиришга тайёр эканини билдирди.
Ўз навбатида Одил ал-Асумий Араб давлатлари уюшмаси, жумладан, Араб парламенти Ўзбекистоннинг Марказий Осиёдаги етакчи ўрнини эътироф этган ҳолда, Ўзбекистон билан барча соҳаларда, хусусан парламентлараро ҳамкорликни янада фаоллаштиришга тайёрлигини қайд этди. Хусусан, араб ишбилармонлари доиралари иштирокида Ўзбекистонда йирик иқтисодий форум ўтказиш таклифи илгари сурилди.
Мулоқот чоғида Ўзбекистоннинг қишлоқ хўжалик маҳсулотларини араб давлатларига экспорт қилиш ва бунда транспорт логистика масалаларини самарали ҳал этиш чоралари ҳам муҳокама қилинди.
Ўзбекистонда гендер тенгликни таъминлаш борасида олиб борилаётган давлат сиёсатининг юқори самараси эътироф этилган ҳолда, 2023 йил Самарқанд шаҳрида Араб ва мусулмон мамлакатлари парламентлари аёл аъзоларининг биринчи форумини ўтказиш ташаббуси илгари сурилди.
Мавзуга доир: Танзила Норбоева Миср Сенати раиси билан фаол ҳамкорликни ривожлантириш масалаларини муҳокама қилди
Изоҳ (0)