Fransiya terma jamoasi hujumchisi Kristofer Nkunku JCH—2022 ni o‘tkazib yuboradi.
“Leypsig” forvardi terma jamoaning 15-noyabr kungi mashg‘ulotlari vaqtida Eduardo Kamavinga bilan to‘qnashib ketgan va buning natijasida jarohat olgan.
25 yoshli futbolchi mashg‘ulot maydonini oqsoqlangan holda tark etgan. Jarohatning qay darajada jiddiy ekani hozircha noma’lum.
Fransiya terma jamoasi Nkunku mundialda ishtirok eta olmasligini tasdiqladi. Uning o‘rnini “Ayntraxt”ning 23 yoshli hujumchisi Randal Kolo Muani egallagan.
Shuningdek, mashg‘ulotlar vaqtida Karim Benzema 15 daqiqadan keyin shug‘ullanishni to‘xtatgan. Xabarlarga ko‘ra, futbolchi to‘psiz individual mashqlarni bajargan va bu oldindan belgilab qo‘yilgan reja asosida amalga oshirilgan.
Fransiyalik futbolchi “Real”ning so‘nggi o‘yinlarini sonidagi jarohat sabab o‘tkazib yuborgandi.
Fransiya terma jamoasi JCH—2022 guruh bosqichida Avstraliya, Daniya va Tunisga qarshi bahs olib boradi. Avvalroq “uch ranglilar” va uning guruhdagi boshqa raqiblari qaydnomani e’lon qilgandi.
Izoh (0)