Srechko Katanes: “Qozog‘istonga qarshi bahs ko‘pchilik uchun derbi va muhim o‘yin bo‘lishi mumkin, ammo men uchun navbatdagi odatiy o‘rtoqlik uchrashuvi”

O‘zbekiston terma jamoasi bosh murabbiyi Srechko Katanes Qozog‘istonga qarshi kechadigan o‘yin oldidan o‘z fikrlari bilan o‘rtoqlashdi.

O‘yin haqida

Odatdagidek o‘rtoqlik uchrashuvi. Qandaydir o‘ziga xos o‘yin deb ayta olmayman. To‘liq tarkib bilan kam vaqt shug‘ullandik.

Osiyo Kubogining 2024-yilda qoldirilishi borasida

Aniq bir rejaga ta’sir qilmadi. Biz har bir vaziyatga moslashishimiz kerak. Aksincha, buning ijobiy tarafi ham bor. Ko‘proq o‘rtoqlik o‘yinlari o‘tkazishimiz mumkin, tayyorgarlik uchun ko‘p vaqt bo‘ladi. Yana bir yaxshi tomoni, chempionat noyabrda tugaydi. Yaxshi tayyorgarlik ko‘rishimizga imkon tug‘iladi. Hozircha JCH—2026 saralashi qachon bo‘lishini bilmaymiz.

Ibrohimxalil Yo‘ldoshevning chaqirilmagani haqida

Men boshqa futbolchilarni sinab ko‘rishni istadim. Shu bilan birga, aytishim mumkinki, u o‘z o‘yinlarini kuchaytirib borishi kerak. Albatta, uning o‘yinlarini kuzatib boryapman. Ko‘pincha asosiy tarkibdan joy olyapti, zaxirada o‘tirgan payti ham bo‘ldi.

U o‘z o‘yinini kuchaytirib borishi, o‘z ustida ishlashdan to‘xtamasligi kerak. U hali yosh, agar 30 yosh bo‘lganida, boshqa chaqirilmaydi deyishimiz mumkin edi.

O‘zbekiston terma jamoasi o‘yinning so‘nggi 10—15 daqiqasida ko‘p gol o‘tkazib yuborishi borasida

Bu barcha jamoalar bilan sodir bo‘ladi. Hatto dunyoning eng yaxshi terma jamoalari ham shu holga tushishi mumkin. Bu nima bilan bog‘liq ekanligini bilmayman, balki charchoqdandir. Kosta-Rika bilan o‘yinga e’tibor bersak, ular so‘nggi daqiqalarda ko‘pchilik bo‘lib hujumga o‘tib ketdi. O‘yinchilar bu vaziyatda o‘zlari aqlni ishlatib, harakat qilishi lozim. Bu uchun ma’lum bir reja yo‘q.

Qozog‘iston terma jamoasining kuchi va futbolchilari haqida

Osiyoni kuchli beshligiga kiritsa bo‘ladimi yoki yo‘q, bilmadim. Bunday terma jamoada hammasi avlodlarga bog‘liq. Yaxshi avlod yetishib chiqsa, shunda o‘sha avlod bilan yaxshi o‘yin ko‘rsatishi mumkin. Qozog‘iston o‘yinlarini tomosha qildim, futbolchilari astoydil kurashadi. Ertaga oson o‘yin bo‘lmaydi.

Besh kishi bo‘lib himoyalanadi va tezda hujumga o‘tib ketadi. Qozog‘iston kurashuvchan jamoa, ammo keragidan ortiq tajovuzkor harakat qiladi. Futbolchilarimiz hammasiga tayyor bo‘lishi lozim.

Menga Qozog‘istonning o‘yinlari juda yoqdi. Alohida kimnidir ajratib ko‘rsatishni istamayman. Jamoaviy yaxshi o‘ynaydi. Sloveniya bilan bahsni ko‘rib chiqdik, tajovuzkor, sal qo‘polroq o‘yin ko‘rsatishdi. Aytib o‘tganimdek, jamoa tajovuzkor harakat qiladi. Jamoaviy ruh hammasini hal etadi.

Qozog‘istonga qarshi prinsipial qarama-qarshilik borasida

Nima qila olaman? Nima deb javob berishim mumkin? To‘g‘ri, siz va ko‘pchilik uchun bu derbi bo‘lishi mumkin. Lekin men fikrimni o‘zgartira olmayman. Bu murabbiy sifatida men uchun navbatdagi o‘rtoqlik o‘yini.

2007-yildagi o‘yinda janjal yuzaga kelgan, lekin terma jamoalarda o‘sha tarkibdan hozir hech kim qolmagan. Albatta, futbolchilar astoydil g‘alaba uchun harakat qiladi. Legionerlar kech yetib keldi, bir yarim kungina to‘liq mashg‘ulot olib bora oldik. Bu bizga muammo keltirib chiqaradi.

Hozir ko‘pchilik bu o‘yinga jiddiy ahamiyat qaratishni so‘ramoqda. Lekin men ham taktik ishlanmalar ustida ishlashim mumkin. Agar menda sehrli tayoqcha bo‘lganida, har bitta o‘yinda g‘alaba qozongan bo‘lardik. Biroq men bu yerga murabbiy sifatida rasmiy o‘yinlarni yutish uchun taklif qilinganman. Bu bahs oldidan hech qanday bosim his qilmayapman.

Shomurodov va Sergeyev haqida

Eldor asosiy tarkibda o‘ynaydi. Shomurodov charchamagan, chunki “Roma”ning oxirgi bahsida maydonga tushmadi. U hozir boshqalarga qaraganda yaxshi holatda.

Srechko Katanes, O‘zbekiston terma jamoasi bosh murabbiyi