Кристофер Нкунку машғулотда жароҳат олиб, Франция терма жамоасини тарк этди. Бензема ҳам 15 дақиқадан кейин машғулотни тугатган

Франция терма жамоаси ҳужумчиси Кристофер Нкунку ЖЧ—2022 ни ўтказиб юборади.

«Лейпциг» форварди терма жамоанинг 15 ноябрь кунги машғулотлари вақтида Эдуардо Камавинга билан тўқнашиб кетган ва бунинг натижасида жароҳат олган.

25 ёшли футболчи машғулот майдонини оқсоқланган ҳолда тарк этган. Жароҳатнинг қай даражада жиддий экани ҳозирча номаълум.

Франция терма жамоаси Нкунку мундиалда иштирок эта олмаслигини тасдиқлади. Унинг ўрнини «Айнтрахт»нинг 23 ёшли ҳужумчиси Рандал Коло Муани эгаллаган.

Шунингдек, машғулотлар вақтида Карим Бензема 15 дақиқадан кейин шуғулланишни тўхтатган. Хабарларга кўра, футболчи тўпсиз индивидуал машқларни бажарган ва бу олдиндан белгилаб қўйилган режа асосида амалга оширилган.

Франциялик футболчи «Реал»нинг сўнгги ўйинларини сонидаги жароҳат сабаб ўтказиб юборганди.

Франция терма жамоаси ЖЧ—2022 гуруҳ босқичида Австралия, Дания ва Тунисга қарши баҳс олиб боради. Аввалроқ «уч ранглилар» ва унинг гуруҳдаги бошқа рақиблари қайдномани эълон қилганди.