Чехия парламентининг қуйи палатаси — Чехия депутатлар палатаси «Россиянинг амалдаги режимини террорчи режим» деб атаган резолюцияни қабул қилди, деб ёзади Meduza.
«Европа Кенгаши Парламент ассамблеяси резолюциясига мувофиқ, Депутатлар палатаси Россиянинг ҳозирги сиёсий режимини террористик режим сифатида тавсифлайди», — дейилади 15 ноябрдаги резолюцияда.
Қарорни мажлисда иштирок этган 156 депутатдан 129 нафари маъқуллаб овоз берди. Депутатлар палатасининг ҳисоботида қайд этилишича, «Озодлик ва тўғридан-тўғри демократия» евроскептик мухолифат партиясининг барча 14 нафар вакили бунга қарши чиққан.
Резолюцияни қўллаб-қувватлаган депутатлар Россиянинг Украинадаги тажовузини, жумладан, электр, сув ёки иссиқлик таъминотида узилишларга олиб келадиган фуқаролик ва энергетика инфратузилмаларига оммавий ҳужумларни қоралади.
Улар, шунингдек, «Украина шарқидаги босиб олинган тўртта вилоятнинг Россияга қўшилиши бўйича референдум натижаларини» тан олишдан бош тортди. Бундан ташқари, депутатлар Россия айбланаётган ҳарбий жиноятларни тергов қилиш учун халқаро жиноий трибунал яратиш таклифини қўллаб-қувватлади.
2022 йил бошида Европанинг бир қанча давлатлари — Литва, Латвия, Эстония ва Польша парламентлари турли шаклларда Россиядаги сиёсий режимни террорчи деб атаган эди. Шундай қилиб, Литва Россияни «террорчи давлат», Латвия Россияни терроризмни қўллаб-қувватловчи давлат, Эстония «терроризмга ҳомийлик қилувчи давлат», Польша эса Россия ҳукуматини «террорчи режим» деб тан олди.
Октябрь ойида Европа Кенгаши Парламент ассамблеяси Россиянинг Украинага нисбатан тажовузкорлиги ҳақидаги резолюциясида Европа Кенгашига аъзо давлатларни Россияни «террорчи режим» деб эълон қилишга чақирган эди.
Изоҳ (0)