Украина Ташқи ишлар вазирлиги Москвадаги қамоқхонада жазо ўтаётган Замбия фуқароси Украинадаги жангда ҳалок бўлганига муносабат билдирди. Бу ҳақда Fokus.ua хабар берди.
ТИВ спикери Олег Николенко ҳодиса ҳақида фикр билдириб, Африка етакчиларини ўз фуқароларини Украинага қарши курашга йўл қўймасликка чақирди. Россия ҳукумати қамоқдаги африкаликларни Украинага қарши агрессив уруш олиб боришга сафарбар қилаётгани, ушбу сиёсат 23 ёшли Замбия фуқароси Лемеҳани Нйиренданинг ўлимига олиб келганини айтди.
«Биз Африка Иттифоқи ва барча Африка давлатларини Россиядан фуқароларини урушга мажбуран ёллашни бас қилишга чақирамиз. Африкаликлар Путиннинг хаста императорлик амбициялари учун ўлмаслиги керак», — дейди ТИВ вакили.
Украинада вафот этган Замбия фуқароси Москвага атом муҳандислиги соҳасида таълим олиш учун келган. Африкалик талаба 2020 йил гиёҳванд моддалар тарқатгани учун 9,5 йилга қамалган. Кремль сентябрда Замбия фуқароси вафот этганини эълон қилган. Замбия расмийлари воқеа тафсилотлари учун Россияга мурожаат қилган, бироқ Россия томонидан ҳеч қандай жавоб бўлмаган. Лемеҳани Нйиренданинг отаси ўғлининг Россия Қуролли кучлари сафига қандай қўшилганини билмаслигини айтган.
Шундан сўнг Замбия Россия ҳукуматидан Москвада қамоқ жазосини ўтаётган фуқароси Украинадаги урушга қандай жалб этилгани ва ҳалок бўлгани ҳақида зудлик билан маълумот беришни талаб қилган.
Изоҳ (0)