Ijtimoiy tarmoqlarda bloger S.S.ning odob-axloq qoidalariga zid ravishda tasvirga olingan videosi tarqalib, keng muhokamaga sabab bo‘lgandi. Toshkent shahri sudlari holat bo‘yicha ma’lumot berdi.
Qayd etilishicha, 11-noyabr kuni jinoyat ishlari bo‘yicha Mirobod tumani sudida S.S. (2001-yilda tug‘ilgan)ga oid ma’muriy huquqbuzarlik to‘g‘risidagi ish ko‘rib chiqilib, u Ma’muriy javobgarlik to‘g‘risidagi kodeksning 183-moddasi (mayda bezorilik)da nazarda tutilgan huquqbuzarlikni sodir etgan deb topilgan.
Ish hujjatlariga ko‘ra fuqaro N.U.ning Mirobod tumani IIO FMB boshlig‘iga yozgan arizasi yuzasidan o‘tkazilgan tekshiruv natijasida S.S. ijtimoiy tarmoqlarda odob-axloq qoidalariga zid bo‘lgan o‘zining ishtirokidagi video va rasmlarni jamiyatda yurish-turish qoidalarini qasddan mensimasdan joylashtirib, jamoat tartibini buzib, fuqarolarning o‘rinli e’tirozlariga sababchi bo‘lgan.
Sudning qarori bilan S.S.ga 5 sutka ma’muriy qamoq jazosi tayinlandi. Ushbu qaror ustidan qonunchilikda belgilangan tartib va muddatda Toshkent shahar sudiga apellyatsiya shikoyati (protesti) berilishi mumkinligi ma’lum qilinadi.