Toshkent viloyati hokimi Zoir Mirzayev Oliy Majlis senati a’zoligiga saylandi. Bu haqda “Daryo”ga hokimlik axborot xizmati ma’lumot berdi.
Qayd etilishicha, bugun Olmaliq shahridagi “Metallurg” madaniyat saroyida viloyatda bo‘shab qolgan o‘ringa O‘zbekiston Respublikasi Oliy Majlisi Senati a’zosi saylovini o‘tkazish bo‘yicha qo‘shma majlis bo‘lib o‘tgan.
Majlisda Markaziy Saylov komissiyasi raisi Zayniddin Nizomxo‘jayev so‘z olib, nomzodni saylash to‘g‘risida yig‘ilganlarga atroflicha ma’lumot berdi. Saylov kodeksiga ko‘ra, majlisga rais etib Xalq deputatlari viloyat kengashi deputati Farhodbek Umarov saylab olindi. Shundan so‘ng majlis reglamenti, majlis kotibiyati, qo‘shma majlis ishini yuritish bo‘yicha hay’at a’zolari, Maslahatlashuv kengashi, sanoq komissiyasi a’zoligi nomzodlari ovozga qo‘yildi hamda deputatlar tomonidan tasdiqlandi, — deyiladi hokimlik axborotida.
Sanoq komissiyasi xulosasiga ko‘ra, qo‘shma majlisda 643 nafar deputat ishtirok etib, ovoz berish jarayonlarida ularning barchasi qatnashgan.
Qo‘shimcha qilinishicha, qo‘shma majlisda deputatlarning 641 nafari Zoir Mirzayev nomzodini yoqlab ovoz bergan. Va Zoir Mirzayev ko‘pchilik ovoz bilan Oliy Majlis Senati a’zosi etib saylangan.
Avvalroq Zoir Mirzayev fuqarolar uchun qabulida hokim qabuliga kelib baqir-chaqir qilayotgan, shuningdek qabulga xalal berayotganlarga murojaat qilib, hokimlarni yomon ko‘ruvchilarning farzandi ham hokim bo‘lsin degani xabar berilgandi.
Izoh (0)