Shavkat Mirziyoyev BMTning Ta’lim, fan va madaniyat masalalari bo‘yicha tashkiloti —YUNESKO bosh direktori Odri Azule bilan uchrashuv o‘tkazdi, deb xabar bermoqda prezident matbuot xizmati.
Qayd etilishicha, 15-noyabr kuni Toshkentda o‘tayotgan Kichik yoshdagi bolalarga tarbiya va ta’lim berish bo‘yicha Butunjahon konferensiyasi doirasida o‘tkazilgan uchrashuvda O‘zbekiston bilan BMT tizimidagi ushbu nufuzli institut o‘rtasidagi konstruktiv va samarali hamkorlikni kengaytirishning amaliy jihatlari muhokama qilindi.
Uchrashuvda Odri Azule O‘zbekistonda yoshlarni qo‘llab-quvvatlash, bolalarga tarbiya va ta’lim berish borasida amalga oshirilayotgan islohotlarni yuksak baholadi hamda ular, xalqaro miqyosda solishtirilganda, eng samarali bo‘layotganini ta’kidladi.
Bosh direktor maktabgacha ta’limni rivojlantirish masalalariga bag‘ishlangan Toshkent xalqaro konferensiyasi muvaffaqiyatli o‘tkazilgani bilan tabrikladi.
Yangi Mamlakat dasturini amalga oshirishga alohida e’tibor qaratildi. Toshkent shahrida YUNESKOning mintaqaviy markazini ochishga, shuningdek, samarali hamkorlik doirasida qo‘shma tashabbus va ilg‘or loyihalarni ilgari surish bo‘yicha yangilangan “yo‘l xaritasi”ni tayyorlash va qabul qilishga kelishib olindi.
Mavzuga doir: YUNESKOning Shavkat Mirziyoyev ishtirokidagi Butunjahon konferensiyasi ochilish marosimi — suratlarda
Izoh (0)