Сречко Катанец: «Қозоғистонга қарши баҳс кўпчилик учун дерби ва муҳим ўйин бўлиши мумкин, аммо мен учун навбатдаги одатий ўртоқлик учрашуви»

Ўзбекистон терма жамоаси бош мураббийи Сречко Катанец Қозоғистонга қарши кечадиган ўйин олдидан ўз фикрлари билан ўртоқлашди.

Ўйин ҳақида

Одатдагидек ўртоқлик учрашуви. Қандайдир ўзига хос ўйин деб айта олмайман. Тўлиқ таркиб билан кам вақт шуғулландик.

Осиё Кубогининг 2024 йилда қолдирилиши борасида

Аниқ бир режага таъсир қилмади. Биз ҳар бир вазиятга мослашишимиз керак. Аксинча, бунинг ижобий тарафи ҳам бор. Кўпроқ ўртоқлик ўйинлари ўтказишимиз мумкин, тайёргарлик учун кўп вақт бўлади. Яна бир яхши томони, чемпионат ноябрда тугайди. Яхши тайёргарлик кўришимизга имкон туғилади. Ҳозирча ЖЧ—2026 саралаши қачон бўлишини билмаймиз.

Иброҳимхалил Йўлдошевнинг чақирилмагани ҳақида

Мен бошқа футболчиларни синаб кўришни истадим. Шу билан бирга, айтишим мумкинки, у ўз ўйинларини кучайтириб бориши керак. Албатта, унинг ўйинларини кузатиб боряпман. Кўпинча асосий таркибдан жой оляпти, захирада ўтирган пайти ҳам бўлди.

У ўз ўйинини кучайтириб бориши, ўз устида ишлашдан тўхтамаслиги керак. У ҳали ёш, агар 30 ёш бўлганида, бошқа чақирилмайди дейишимиз мумкин эди.

Ўзбекистон терма жамоаси ўйиннинг сўнгги 10—15 дақиқасида кўп гол ўтказиб юбориши борасида

Бу барча жамоалар билан содир бўлади. Ҳатто дунёнинг энг яхши терма жамоалари ҳам шу ҳолга тушиши мумкин. Бу нима билан боғлиқ эканлигини билмайман, балки чарчоқдандир. Коста-Рика билан ўйинга эътибор берсак, улар сўнгги дақиқаларда кўпчилик бўлиб ҳужумга ўтиб кетди. Ўйинчилар бу вазиятда ўзлари ақлни ишлатиб, ҳаракат қилиши лозим. Бу учун маълум бир режа йўқ.

Қозоғистон терма жамоасининг кучи ва футболчилари ҳақида

Осиёни кучли бешлигига киритса бўладими ёки йўқ, билмадим. Бундай терма жамоада ҳаммаси авлодларга боғлиқ. Яхши авлод етишиб чиқса, шунда ўша авлод билан яхши ўйин кўрсатиши мумкин. Қозоғистон ўйинларини томоша қилдим, футболчилари астойдил курашади. Эртага осон ўйин бўлмайди.

Беш киши бўлиб ҳимояланади ва тезда ҳужумга ўтиб кетади. Қозоғистон курашувчан жамоа, аммо керагидан ортиқ тажовузкор ҳаракат қилади. Футболчиларимиз ҳаммасига тайёр бўлиши лозим.

Менга Қозоғистоннинг ўйинлари жуда ёқди. Алоҳида кимнидир ажратиб кўрсатишни истамайман. Жамоавий яхши ўйнайди. Словения билан баҳсни кўриб чиқдик, тажовузкор, сал қўполроқ ўйин кўрсатишди. Айтиб ўтганимдек, жамоа тажовузкор ҳаракат қилади. Жамоавий руҳ ҳаммасини ҳал этади.

Қозоғистонга қарши принципиал қарама-қаршилик борасида

Нима қила оламан? Нима деб жавоб беришим мумкин? Тўғри, сиз ва кўпчилик учун бу дерби бўлиши мумкин. Лекин мен фикримни ўзгартира олмайман. Бу мураббий сифатида мен учун навбатдаги ўртоқлик ўйини.

2007 йилдаги ўйинда жанжал юзага келган, лекин терма жамоаларда ўша таркибдан ҳозир ҳеч ким қолмаган. Албатта, футболчилар астойдил ғалаба учун ҳаракат қилади. Легионерлар кеч етиб келди, бир ярим кунгина тўлиқ машғулот олиб бора олдик. Бу бизга муаммо келтириб чиқаради.

Ҳозир кўпчилик бу ўйинга жиддий аҳамият қаратишни сўрамоқда. Лекин мен ҳам тактик ишланмалар устида ишлашим мумкин. Агар менда сеҳрли таёқча бўлганида, ҳар битта ўйинда ғалаба қозонган бўлардик. Бироқ мен бу ерга мураббий сифатида расмий ўйинларни ютиш учун таклиф қилинганман. Бу баҳс олдидан ҳеч қандай босим ҳис қилмаяпман.

Шомуродов ва Сергеев ҳақида

Элдор асосий таркибда ўйнайди. Шомуродов чарчамаган, чунки «Рома»нинг охирги баҳсида майдонга тушмади. У ҳозир бошқаларга қараганда яхши ҳолатда.

Сречко Катанец, Ўзбекистон терма жамоаси бош мураббийи